Meteo ta desmenti cu Aruba ta bou di efecto di Equinox

ORANJESTAD – Departamento di servicio meteorologico a desmenti awe cu Aruba ta bou di efecto di e asina yama ‘Equinox’. Esey ta e fenomeno di tempo cu ta sosode dos biaha pa aña ora cu e dia y anochi su duracion ta igual. E ta ora cu e solo ta crusa e Ecuador celestial. E por nifica temperatura mas calor cu normal. Pero den e caso aki tin un noticia falso cu ta circulando cu nos ta bou di e efecto aki awor. “E ta totalmente falso...Equinox a pasa for di dia 21 di maart y no ta sperando ningun ola di calor” Meteo a sigura prensa awe. Pa loke ta e calor, a sigura cu e temperatura maximo lo yega 33 grado awe y pa proximo dianan lo e no supera 34 grado Celsius...” Pues e message cu ta bayendo round aki y por causa panico ta completamente falso y no a sali for di Meteo Aruba” e departamento a sigui bisa.