Falta algun ora mas pa e prome debate electoral 2017

ORANJESTAD – Awe anochi lo tuma luga e prome debate electoral entre e 7 partidonan politico cu a registra. E debat ta cuminsa pa 7’or awe nochi te cu 11’or. Pa garantisa un fluho corecto, KVK a impone reglanan specifico.

Regla pa participantenan y pa publico encuanto interupcion

KvK ta stipula algun regla tanto pa e participantenan como pa publico presente. Esaki pa mantene e orden y brinda un evento na un nivel halto. Ta prohibi pa e publico presente interumpi e debate. No ta permiti pa e participantenan interumpi y/o stroba otro durante nan discurso. Aplauso ta permisibel unicamente despues di contestacion di un pregunta y tambe na final di e programa. Solamente e moderador por interumpi e participantenan durante nan discurso.

REGLANAN DI CONDUCTA PA PARTICIPANTE

Ta importante pa e participantenan respeta otro y sigui e instruccionnan di e moderador y e panel pa hunto contribui na un debate transparente y di nivel.

−       Tur participante mester atene su mes na e reglanan di e debate

−       Tur participante lo ricibi e topiconan di e debate prome cu e debate y no lo tin oportunidad pa prepara durante di e debate

−       No haci propaganda politico como parti di reaccion ni di contesta riba un pregunta

−       Tur participante lo duna un contesta bon argumenta, tanto como reaccion como tambe contesta riba e preguntanan

−       E contesta (y argumentacion) mester ta obhetivo, cortico y al caso

−       Contestanan emocional pa toca e sentimento di e publico ta permisibel, basta cu no trata di maneha e publico na antoho

−       No interumpi e debate

−       No stroba ni papia ora cu un otro participante ta na palabra

−       No discuti, grita, altera, ofende, discrimina ni ataca otro personalmente, etc.

Reglanan di conducta pa publico

−       No interumpi e debate

−       No stroba ni ofende otro persona vociferando opinion, propaganda o preferencia politico

−       No interumpi, stroba, descurasha ni ofende ningun lider politico

−       No discuti, grita, altera, ofende, discrimina ni ataca otro, etc.

No ta permiti pa trece material di promocion politico na e evento (incl. stickers, bandera, etc.). Ta importante pa publico tin un bon comportacion na tur momento y e reglanan di conducta lo wordo anuncia door di e moderador na comienso di e evento y si ta necesario lo wordo ripiti durante di e evento.

Personanan cu mal conducta y cu no atene nan mes na e reglanan di conducta lo wordo atendi riba esaki door di e moderador verbalmente (1 advertencia). Si e persona no corigi e mal conducta, e lo wordo pidi pa bandona e sala di inmediato y lo wordo escolta door di siguridad pafo di e sala.

E dos debatenan lo tuma luga den e ballroom di Marriott Grand Ballroom y lo ser transmiti tambe en bibo via Tele-Aruba.

KvK ta haya importante pa e eleccion ta uno transparente y kier contribui pa e pueblo votado por scucha di e lidernan di e partidonan participante kico ta nan punto di bista riba e diferente topiconan cu lo wordo treci dilanti y cu ta na interes general di Aruba. NOTA: Riba e potret di NoticiaCla, falta lidernan politico Mike Eman, Otmar Oduber y Evelyn Wever Croes. Eman tabata ocupa cu otro evento, Oduber tabata ausente pa motibo personal familiar, y Wever tabata riba un biahe di trabou. Tur tres a priminti di lo ta presenta durante e debate awe nochi.