Analysis electoral: Ken a coi cos di ken?

E prome debate no a ni tuma lugar caba, of ya e guera ta ‘on’ entre partidonan politico y e instancianan cu ta organisa e evento. Partidonan cu a rebeldia, sapatia y fulmina pasobra nan no por a participa. Otronan cu a haya chens pa participa, a dicidi cu no ta participa. Of segun otro version, nan lo a wordo laga afo deliberadamente. Nos no a wak e pruebanan pues no por husga. For di nos ultimo analysis, mucho no a cambia. E unico cos diferente ta cu e fecha di eleccion ta yegando mas y mas cerca. Y e forma con nos por sa si weekend a cuminsa, ta e trafico pega pa motibo di e circo di sticker, parada y bandera. Uno ta pone bandera, pa e otro kita. Hopi partido tin campaña individualista, en bes di partido. Claramente e ta mustra ken tin e placa y ken no. Tin partido cu tur dia ta na radio. Tur dia. Otronan ta riba rednan social, cu tur sorto di comunicado. Y tur ta mescos, lastra otro, y mustra cu nan ta esun cu ta miho. Ta purba convence pakico nan ta miho, pakico mester vota pa nan, y pa (atrobe) nos tende pakico e contrincante ta e problema.

Varios di esnan miembro di un of otro partido ya tin experiencia di a goberna. Y nan tur, awor ta mustra cu nan sa miho cu tempo cu nan a sinta. Sea nan a siña di nan les, of simplemente diripiente nan a lanta for di soño y a ripara cu e loke cu nan tabata haci of tabata parti di dje, no tabata bon. Y entre tur esaki, aki aya partidonan ta blo presenta candidatonan nobo. Algun ta hacie estilo eleccion di reina. Otro ta haci'e cu parada. Mientras otro, wel, ta purba haci'e den un forma mas moderno, uzando rednan social pa lansa su mes. Na final, tur cos ta keda mescos. Tur ta bin riba un lista cu e lider ta traha, basa riba number y secuencia. Y atrobe, despues di eleccion, esun cu ta mas halto riba lista (a lo menos cu e saca su mes), ta bin na remarke pa un funcion. Pero, falta hopi pa esey ainda. Pa awor, importante ta, ken ta haci mas buya, spanta mas hende, crea un ambiente di teror den bario entre partido. Mas buya, mas bandera, mas sticker, ta haci mas impacto y, posiblemente mas voto. Si, asina ignorante e situacion por ta. Y mientras cu porfin dos partido a cuminsa traha riba nan programa, hasta aki tin midimento di ken a haci kico, y ken a copia nan forma di haci programa innovativo. E guera mas obvio ta bay ta entre e partido berde y un di esunnan blauw. Un di nan, pasobra tin varios cu ta reclama cu nan tin e color blauw. Ni ora di traha programa, no por tin un diferencia. Berde y ex berde ta midi ken a coi cos di ken, etc.. Y ami cubo, tin cu sinta warda wak cua ta cay prome. Eleccion 2017. Pa hopi, un tempo cu hopi ambiente. Otronan no por warda pa dia 23 di september yega.. Cua grupo abo ta?