Posibel MOU pa hotel pa San Nicolas na october

ORANJESTAD - Gobierno tin planea pa anuncia dialuna awor cu lo firma un Memorandum of understanding cu e grupo hotelero di Republica Dominicana, Grupo Pinjeros, pa e proyecto Bahia Principe bira un hecho pa Aruba. NoticiaCla.com a compronde cu e intencion ta pa comienso di otro anja caba cuminsa construccion di e hotel na San Nicolas, y pa 2016 keda cla cu e prome fase di 300 camber. Minister di turismo Otmar Oduber a anuncia solamente riba su pagina Facebook cu e ta entusiasma pa haci un anuncio grandi dialuna awor. E mandatario a confirma na NoticiaCla.com recientemente cu e proyecto enberdad ta un concepto di All Inclusive, no obstante cu e concepto aki no ta permiti mas na Aruba. Sinembargo, pa San Nicolas, esaki nunca tabata un prohibicion. 

E proyecto hotelero aki no ta e prome cu ta purba yega San Nicolas ya cu den pasado caba e grupo presidi pa e hefe di Divi, Alex Nieuwmeyer tabata entretene e idea aki. Den nan caso tambe tabata trata di un concepto All Inclusive, teniendo nan concepto di Divi 'intacto'. No ta conoci exactamente con e proyecto lo por impacta San Nicolas, mirando cu ta trata di un proyecto all inclusive, y ademas ta haci mencion di un shoppingmall aserca, cu por ta competencia pa e tiendanan na San Nicolas mes. Esaki no ta kita afo cu e ta un proyecto ambicioso, teniendo na cuenta cu te ainda ningun proyecto hotelero a materialisa na San Nicolas. Di informacion cu NoticiaCla.com tin, e proyecto actual ta uno ambicioso hopi adelanta, unda cu ni placa ni plan no ta un problema pa e grupo y cu ta pone cu esaki por keda cla mas liher cu otro proyectonan pendiente actualmente. E foto ta uno archi=vo