Awe hues ta trata posibel caso di faillisement di InselAir Aruba

ORANJESTAD – Awe tardi hues ta atende e caso di faillisement di InselAir Aruba. Manera cu NoticiaCla a raporta caba, e administrador di e compania (apunta pa hues) Jeanot de Cuba a pidi corte pa revoca e proteccion di bancarota (surseance van betaling) debi cu e no ta mira indicacion cu lo por tin progreso pa e compania. E portal aki a compronde mientrastanto cu e compania lo tin un plan avansa di restructuracion. Si esaki ta logra convence hues cu nan por sigui dilanti, no ta conoci. E portal aki a compronde cu e informacion cu e compania lo tin of e forma cu ta atendiendo esaki, no ta suficiente pa para e faillisement (bancarota). No ta conoci si hues lo bay di acuerdo cu e argumentonan di e administrador, of ta duna e aerolinea un oportunidad mas. E caso ta tuma lugar 2’or tras di porta cera, esta no pa publico.

ULTIMATUM SINO TA PULL THE PLUG

Manera e portal aki a raporta algun siman atras den forma di primicia, si den dos siman, gerencia di InselAir Aruba no a presenta un plan di restructuracion of ‘restart’ pa e compania, e administrador apunta pa Corte, Jeannot de Cuba lo ‘pull the plug’ osea, sugeri Corte pa kita e proteccion di bancarota. Asina tabatin den e rapport di 8 pagina cu NoticiaCla.com tin den su poder. Cu esaki ta habri caminda pa corte declara e compania bancarota. Esaki contrario na e declaracion haci pa e director Stephan van Spaandonk na maart. E tempo ey el a bisa cu ‘a reuni cu empleadonan di e aerolinea na unda a duna e bon noticia di e veredicto (di proteccion di bancarota) y subsecuente continuacion di e plan di rescate, cu ya ta riba bon caminda. Awor ta resulta cu no tin ningun plan di rescate (ainda) segun de Cuba.