Richard Arends evaluando futuro continuacion como minister

ORANJESTAD – Minister Richard Arends ta keda minister pa e proximo gabinete tambe. Asina ta e pensamento di minister presidente Mike Eman na NoticiaCla. Arends mes no a dicidi ainda, y ta tene su opcionnan habri. “Na su debido tempo mi lo considera” Arends a sigura e portal aki. Mes momento ela desmenti un rumor tambe cu tabata circula, esta cu e tin un trabou sigura na Refineria di Aruba y/of Citgo. E informacion tabata cu e mlo a keda minister solamente te september, pa despues e asumi un funcion cu e refineria/upgrader. “No ta berdad!” Arends a continua. E ta confirma cu e ta un miembro di partido y un vakminister (pa awor).

FUTURO DI POLITICO DI ARENDS

Prome minister Eman y lider di e partido berde no tin pensa di laga Arends bay. “Richard lo keda un figura publico pa basta aña mas, aportando na pais Aruba. Y lo mi desea pa mir'e como minister den e siguiente gabinete” Eman a bisa. Arends mes no ta pensa asina leu ainda. “Aworaki mi ta gefocused pa cumpli cu mi tareanan di minister debidamente” ela sigui bisa. Despues elo considera esaki na su debido tempo. Eman sinembargo ta pensa cu Arends lo keda. “E ta keda. E ta keda siguramente cu si” Eman a sigura bisando.

PROBLEMA CU FAMIA?

Un di e motibonan pa atende cu e asunto aki, ta e hecho cu tin informacion cu ta mustra cu e asunto ta poco mas complica cu esey. Su tata ta consehero principal di e (awor) opositor politico Otmar Oduber, esta Simon Arends. Y e informacion ta cu famia a bay di acuerdo pa (Richard) Arends bira vakminister, y keda solamente te september pa despues e asumi su trabou na Citgo. Cualkier otro envolvimento mas solido cu e partido berde, por a crea un problema den famia. Arends (Richard) sinembargo ta desmenti e informacion ey categorico. “Not at all”, tabata su reaccion riba e asunto ey. “Semper mi a evalua tur yamado cu partido a haci riba mi: na 2007 pa ta presidente di FESCA, pa ta consehero y hefe di gabinete den ambos gobernacion, na 2013 pa bira minister plenipotenciario na Den Haag y awor ultimamente pa asumi e cargo di minister di asuntonan economico na 2016. So, in due time I will consider”, Arends a finaliza bisando. Como tal, cu e rumor kita for di mesa, Arends ta bira otro candidato potencial pa e partido, y continua como minister den un eventual otro gabinete berde, si e mes dicidi pa esey tambe. E opcion por lo menos ta hancho habri, segun Arends mes a confirma pa e portal aki.