Hulanda lo no entrega su posicion di poder den disputa di reino

HILVERSUM – “Hulanda lo no acepta nunca cu e ta haña un punto di bista di minoria den un comision cu mester resolve disputa den reino”, asina Gert Oostindie, profesor di historia caribense, ta bisa. Sabio di derecho politico Gerhard Hoogers tin poco speransa pa un comision caminda Hulanda ta perde su posicion di poder den decreto di reino.

E parlamentonan di Aruba, Corsou y Sint Maarten resientemente a palabra cu nan ke urgi pa un comision di disputa cu mester duna un huicio independiente tocante un eventual diferencia di opinion entre e paisnan. “Niun gobierno no por hunga hues riba su propio actuacion”, segun e miembro di Staten arubano René Herdé poco tempo pasa ora di acepta un resolution pa traha riba un comision asina.

Pero tanto segun Oostindie como Hoogers e chens ta chikito cu ta bini un comision cu por cambia algo na e particion di poder actual. Especialmente Hulanda tin añanan largo ta keda pusha e plannan pa start un comision di disputa un banda. E motibo di mas prinsipal p’esaki ta cu gobierno hulandes di tur manera ke mantene su posicion di poder aktual.

Ta Rijksministerraad (RMR) ta tuma desision tocante asunto cu ta toca henter reino y Hulanda tin un voto di mayoria den RMR. Pasobra tur minister ta den e conseho ei, hunto cu e tres ministernan plenipotenciario di e otro paisnan den reino. Oostindie: “Ke men semper Hulanda tin ultimo palabra den Rijksministerraad. Nan no ta bai entrega esaki. E islanan ta haña cu Hulanda ta abusa di e posicion ei.”

E posibilidadnan pa e paisnan caribense pa haña e comision di disputa desea ta limita, asina Hoogers tambe ta pensa. “Hulanda no gusta control di un instancia independiente manera un hues. Politica mester core su curso, ta e idea na Hulanda. No tin mester di hende bin hasi co’i caweta.” Hoogers ta kere cu e deseo di e paisnan solamente tin un chens di logra si Tweede Kamer hiba e lucha aki: “Ta djei e presion politico mester bini.

Kico lo ta un alternativo pa un comision di disputa independiente? Hoogers tin idea si tocante di esaki: “Na Dinamarca, tambe un reino cu pais autonomo, nan tin un solucion elegante. Ei pa disputa di reino nan tin un comision cu dos representante di cada pais y ademas tres miembro di Conseho Mayo. Si e representantenan no bini cla nan cu nan, e tres sobra miembronan ta dicidi.

Oostindie ta constata cu den practica ta soluciona e conflictonan pa decena di aña caba na un manera casi identico: esta cu un areglo. “Si Hulanda haña cu e paisnan caribense ta keda sin tuma un cierto accion nan ta bisa: ‘Nos ta prefera di no interveni, pero si boso no tuma boso responsabilidad nos ta haña nos ta interveni tog.’ E ora ei e paisnan ta bisa ku nan ta prefera di hacie nan mes anto e ora ei Hulanda ta haña bon.”

Motibo pa e iniciativa resien di e parlamentonan ta e falta di comprension caribense tocante e conflicto di gobierno arubano cu RMR tocante e presupuesto e zomer aki y e instruccion cu a duna Sint Maarten mas prome den aña pa forsa un investigacion di integridad.

 for di Red Karibense, Autor: Jamila Baaziz