Eman: Funcion hefe di DIA no ta un problema pa e subi lista

ORANJESTAD – E integracion di hefe di Departamento di Informacion di Aruba (DIA) Carlos Bermudez (49) riba un lista politico (den e caso aki AVP), no ta un problema segun prome minister Mike Eman. Ora cu a conoce di e lansamento di e candidato, tabatin preocupacion y critica den comunidad cu e paso aki por ta ‘peligroso’, ya cu e persona aki tin control di datonan personal di hende y cu esaki por wordo ‘maluza' den temporada di campaña, na beneficio di e partido cu e ta forma parti di dje awor. E mandatario tin otro pensamento. Su huramentacion pa e funcion, tin cu ‘sigura’ cu e ta sigui haci su trabou eticamente, segun e mandatario.

RESPONSABILIDAD PROFESIONAL DI BERMUDEZ

Segun Eman, Bermudez ta un profesional cu conoce su responsabilidad profesional. Pa cuminsa, Eman ta pensa riba e parti electoral cu no ta automatisa pues e no mester ta un problema pa Bermudez por ta riba e lista. Ademas segun Eman, e proceso electoral ta keda den man di Censo, Kiesraad y tur institutonan conoci. “E departamento di automatisacion di gobierno ta duna un servicio na locual organisadornan di eleccion ta pidi” Eman a bisa. Compara cu paisnan internacional, unda cu eleccionnan ta automatisa, no por verifica e resultado y wak si enberdad algo a wordo manipula. Pues no tin cuestion di cuestiona resultado di eleccion, relaciona cu DIA.

ACCESO NA INFORMACION CRUCIAL POR WORDO MALUSA

No obstante e interpretacion di e prome mandatario, a mustr'e riba e hecho cu Bermudez tin informacion den su poder, of na su alcance cu por wordo maluza, of tin e percepcion di maluzo. Esey ta un di e preocupacionan di e.o. partidonan opuesto y tambe profesionalnan riba otro tereno cu a cuestiona e candidatura seriamente, pa e simpel motibo ey so y no necesariamente e candidato. Eman ta considera esey un acusacion cu por wordo haci na cualkier persona cu ta den gobierno. “Sea riba lista of no riba lista, mi ta kere cu un hende ta riba lista, su wowonan ta mas grandi riba dje cu supuestamente un hende cu no ta riba lista y ta parcial y e no ta sigui su huramentacion”, e prome mandatario a sigui bisa. E no ta kere cu e argumento contra e candidatura tin validez. E hecho cu e persona ta bay riba lista, no ta cambia e huramentacion cu ela haci y compromiso cu su trabou. “Bo mester ta un tiki mas nervioso pa esnan cu bo no sa cu nan ta hopi partidario y por haci algo incorecto”. Ora cu a puntra e mandatario cu si e no ta considera algo no etico pa un director di un departamento manera DIA bay riba lista, e mandatario a bisa. “No, absolutamente. E reglanan ta bon estableci. E hecho cu bo ta bay riba lista, ta cambia nada den bo obligacion como ambtenaar pa haci locual bo mester haci”. Ora cu a puntra e mandatario, ki garantia tin e ora cu informacion crucial lo no sali, e mandatario a bisa ta cada ambtenaar su huramentacion. Esey ta ‘sigura’ cu e ta haci su trabou, ‘na eer en geweten’. “Esey ta e garantia cu nos tin, y naturalmente e forma con nos por controla esey”, Eman a finalisa bisando. Foto ta cortesia gobierno, di e evento di diasabra ultimo ora cu Bermudez a postula su mes como candidato pa e partido. SCUCHA E ENTREVISTA AKI