Gobierno buscando opcion pa bin cu aerolinea regional

ORANJESTAD – Gobierno di Aruba ta buscando un opcion pa bin un aerolinea regional cu por bay probablemente absorba un parti grandi di e personal di InselAir Aruba. Asina e prome mandatario di Aruba Mike Eman a reacciona pa NoticiaCla riba e posibel bancarota di e aerolinea local e siman aki. Manera e portal aki a raporta den forma di exclusividad, diaranson e administrador encarga cu e aerolinea, Jeannot de Cuba ta bay pidi corte pa revoca e proteccion di bancarota. Esey ta haci e caminda liber a creditornan pidi bancarota pa e compania.

ALTERNATIVA

Eman a referi na su combersacion cu KLM recientemente, riba posibilidad pa KLM maneha un compania regional, tipo ABC connect. Riba esey, a reuni cu varios pionero local di aviacion pa crea un aerolinea nobo. “E aerolinea nobo mester ta esun cu lo sigui cu e coneccionan regional y duna oportunidad na hopi di esnan cu ta traha na InselAir pa sigui nan carera. E compania cu Eman ta premira pa tuma over ta di entrepreneurs Arubano na prome lugar.

COMPROMISO Y INTERES DI KLM

E prome mandatario a confirma cu KLM sinembargo no a haci e compromiso ey ainda, pero a mustra mas positivo pa e posibilidad pa maneha un aerolinea estilo di Schiphol ta maneha aeropuerto di Aruba. No necesariamente cu KLM lo ta un di e accionistanan. “Esey lo duna confiansa na e inversionistanan” Eman a bisa, mirando e nomber cu KLM tin. Ora cu a confronta Eman cu e hecho cu prensa Hulandes ta cita KLM cu nan no ta interesa pa involucra den un operacion regional, Eman a bisa cu ta cu president di KLM el a papia, y e tabata hopi cla cu su informacion. “Nan tabata preocupa cu loke a pasa cu KLM y nan kier a haci un inventarizacion di locual a pasa. Pero mesun lugar tabata cla cu e modalidad di un tipo di management agreement, seguramente ta algo cu nan ta pensa riba dje. Nan no a bisa si, pero nan ta wak e como un opcion”. Ora cu a puntra con leu e plannan aki ta, Eman a bisa cu ta den fase inicial.