Ley di Crèche sostene pa tur fraccion den Parlamento

ORANJESTAD - Dialuna dia 5 di juni, Parlamento di Aruba a trata dos ley presenta pa Minister di Enseñansa, Michelle Hooyboer-Winklaar, esta e Ley di Kinderopvang (Ley di Crèche) y e Begroting Onderwijsfonds 2017. Ambos ley a conta cu sosten unanime di tur fraccion den Parlamento. 

E Ley cu ta trata Kinderopvang, miho conoci como e Ley pa regula Crèche of Centronan di Cuido, ta regarda e reglamento y supervision di tur Centro di Cuido di mucha na Aruba. Por lo menos 55 aña pasa e prome centro a habri su porta y 28 aña pasa a skirbi e prome concepto di ley.

Durante e ultimo decadanan e necesidadnan di e centronan aki a sigui aumenta, pero nunca a pasa y ehecuta un ley pa stipula condicionnan pa regula e calidad cu e centronan ta ofrece. Den pasado a hasta pasa varios incidentenan cu mucha, y sin un ley no por a haci mucho pa atende riba e falta di siguridad na algun centro. 

Cu introduccion di e ley aki a opta pa traha den fase, pa asina duna e centronan suficiente tempo pa adapta si mester pa por cumpli cu e ley y pa yuda nan brinda un miho calidad. E ley ta encera entre otro e nivel di enseñansa minimo cu esunnan cu ta traha den un centro mester tin (LBO), e leidster/mucha ratio, es decir cuanto ta e cantidad maximo di mucha pa cada lider cu e centro por tin y kico ta e aspectonan di siguridad y higiena cu mester tene cuenta cune pa opera un centro. Banda di esaki ta stipula e obligacion pa centronan registra y ricibi un permiso pa por opera.

E aspecto di opleiding tambe ta wordo regla den e ley, y aki ta unda Gobierno lo bin cu e programa di training pa esunnan cu ta traha den e Centronan pa ofrece LBO opleiding pa tur cu ainda no tin diploma. Den e training aki lo tene cuenta cu e experencia cu e lidernan tin y cu e competencianan cu nan a adkiri den nan trabou.

Pa loke ta trata e ratio, artikel 13 ta referi na e cantidad di mucha per begeleider:

a. max 6 mucha entre edad 6 siman te 1 aña 

b. max 10 mucha entre edad 1 te 2 aña;

c. max 12 mucha entre 2 aña te cu 3 aña;

d. max 13 mucha entre 3 aña te cu 4 aña;

Si ta trata di grupo di edad mixto, e ta e averahe di e dos categoria.

Awor cu a aproba e ley, Gobierno lo stipula un fecha cu e ley lo drenta na vigor. Esaki ta premira entre 6 pa 12 luna y pa e diferente exigencianan di calidad lo stipula periodonan di transito. Un ehempel ta cu lo duna un periodo di transito di dos aña pa e ratio, esta e cantidad di mucha per begeleider. Lo traha hunto cu Fundacion Pa Nos Muchanan y e Centronan pa trece tur informacion necesario cerca di e centronan.