Sevinger: No a privilegia Leoncita cu otorgamento di tereno

ORANJESTAD – E publicidad rond di e comerciante popular Leoncita Arends e ultimo dianan aki relaciona cu asunto di tereno, tin un palabra segun minister di infrastructura Benny Sevinger: ”Desesperacion”. Asina e mandatario a bisa NoticiaCla awe mainta. E ta desesperacion di e contrincantenan politico di e partido berde. Sevinger ta sigura e portal aki cu tur loke a tuma lugar pa loke ta tereno pa e persona aki, ta legal y cu e tabatin derecho riba dje. Ora cu a sigui puntra e mandatario si ningun momento a privilegia e persona aki y su famia, e mandatario tabatin un palaba so “No!”.

CAMPAÑA DI AVP

Segun Sevinger, e documentonan y corant cu a sali, ta maniobra di e partido di oposicion MEP, publicando tur loke tin di haber cu otorgamento di terenonan pa e famia aki. “Nan no tin ningun argumento pa trece den pueblo” Sevinger a bisa. E forma cu MEP ta kere cu nan por trece gobierno den un desventaha, ta bini cu no ta klop. “M'a bisa prensa hopi biaha. Si bo kier wak cuanto tereno un hende a haya, bo ta liber pa bay kadaster y bo ta busca na hypoteek kantoor cuanto tereno un persona a haya” e mandatario a bisa. “Pero si bo kier bay tras di un corant cu ta bisa cu un hende a haya un miyon na tereno, bo no ta keda cla, pasobra nan lo keda bisa diferente. Mi no por reacciona riba cos cu no ta berdad” Sevinger a bisa. E mandatario ta mustra cu esaki lo sigui.

MEP A HAYA MAS TERENO

Integrantenan di partido MEP a haya mucho mas tereno cu e persona Arends a haya segun Sevinger. “Sr Nel Oduber mes mi a duna 3 mil m2, Dangui Oduber mi a duna 3 mil m2, cada ruman tin reserva pa nan, kiermen akinan caba so por papia di 10 mil m2, pa cual nan tin derecho riba dje. Nan ta ciudadanonan Arubiano. Nan a pidi'e y nan por hay'e” e mandatario a sigui bisa.

UN MINISTER NO POR PRIVILIGIA NINGUN HENDE

E mandatario a sigura e portal aki cu ‘un minister no por privilegia ningun hende’. “Tur hende tin derecho di pidi y si bo ta cumpli cu regla, si bo ta cumpli cu ley, y tur e normanan cu ta bin den un peticion, bo ta hay'e”, Sevinger a sigui bisa. Si bo no ta cumpli, bo no ta hay'e.”Asina facil e ta”. E mandatario a finalisa bisando.

INFORMACION CORECTO

E portal aki no por a confirma independientemente (ainda) cu e departamentonan en cuestion di tereno (kadaster) riba e declaracion di e mandatario. Pa loke ta e parlamentario Dangui Oduber, e portal aki a tuma contacto cu ne y a haya e siguiente declaracion. Segun Oduber, berdad cu su tata Nel Oduber tin un tereno cu ela haya masha aña pasa, di famianan, tereno huurgrond cu e ta uza pa haci plantacion. Segun ley, cada pasa periodo mester pidi gobierno permiso pa extende e derecho di e tereno, locual su tata a haya tambe. Pero no ta asina cu ta su tata a haya tereno otorga di Sevinger. E mes a enberdad tambe a haya tereno, pero no manera cu Sevinger a bisa. Segun Oduber, ela haci peticion tempo di gobierno di MEP y a haya tereno ora cu e tempo ey Marisol Lopez tabata minister. Ela haya e tereno y a traha su cas ariba. Pa loke ta su dos rumannan, berdad ambos a haci peticion, pero Sevinger a nenga esaki. Oduber a sigura e portal aki cu te hasta durante un momento den parlamento, Sevinger a bisa cu 'over his dead body' e rumannan di (Dangui) Oduber lo a haya tereno. E ta mustra cu no ta cuestion di ken ta haya tereno, sino kico bo ta haci ora cu bo haya e terenonan. Tanto su tata y e a haya tereno y a uz'e manera mester ta, no manera e caso actual di Leoncita Arendsunda cu ta haya tereno di gobierno y ta bende esaki bira miyonario riba custia di pueblo. Intento pa tuma contacto cu  departamento di tereno (kadaster), no tabata exitoso ainda. Tambe a purba tuma contacto cu sra Leoncita Arends, pero a compronde cu e no ta papiando riba e tema cu prensa, y cu e ta preparando un caso den corte riba e tema. SCUCHA E COMBERSACION CU BENNY SEVINGER RIBA E TEMA AKI.