Aruba, Corsou y St Maarten a firma acuerdonan durante congreso HCCA

ORANJESTAD - Cu Minister di Salud Publico, Desaroyo Social di Sint Maarten, Emil Lee y Minister di Salud Publico, Cuido di nos Grandinan y Deporte di Aruba, Dr. Carlos "Alex" Schwengle como testigonan, e dos Inspectornan General di Salud Publico di Sint Maarten y Aruba a firma un acuerdo den cual ta stipula mas cooperacion entre e dos entidadnan di supervision y di control di calidad di cuido. Tambe a firma acuerdo cu e minister di Corsou Suzy Camelia Römer riba otro topico (wak potret).

Dr. Earl Best, Inspector General di Sint Maarten y mr. Dorylee Lopez Penha, Inspector General di Aruba a acorda cu e dos Inspeccionnan lo traha hunto riba tereno di intercambio di personal, profesionalnan medico y protocolnan. 

"Locual esaki kiermen ta cu por ehempel si tin un investigacion andando na Aruba y cu Inspeccion di Aruba ta sinti cu e caso ta hopi complica of ta desea pa por conta cu extra experticio, cu e Inspector di Sint Maarten por bula bin Aruba pa haci'e", asina Dr. Earl Best a splica despues di a caba di firma e acuerdo.

Di otro banda, mr. Dorylee Lopez Penha a duna di conoce cu e Inspeccion di Salud Publico di Sint Maarten a inicia den forma independiente despues cu e isla a para riba su mes, esta na 10-10-10. "Bisando esey, nan tin 7 aña mas di experencia cu nos y como tal nan por duna nos un bon man awor cu nos a cuminsa aki na Aruba. Nos semper tabatin un bon contacto cu nan y awor ta formalisa e bon relacion aki den un acuerdo formal, cu ambos Minister como testigo".

Mas leu e Inspector General di Inspeccion di Salud Publico di Aruba (IVA) a sigura cu Sint Maarten semper a duna conseho y a comparti experencia y a mustra disponibilidad di intercambia experticio. "E intencion ta pa nos yega na e mesun acuerdo asina cu Corsou y cu e islanan BES tambe. Esey ta e idea....y mi ta convenci cu nos lo yega eynan pronto", di acuerdo cu mr. Dorylee Lopez Penha. Foto gobierno y di minister Alex Schwengle su facebook.