Yrausquin: Hulanda a secuestra nos presupuesto

ORANJESTAD – “Hulanda a secuestra nos presupuesto” y “e autoridad como minister a wordo kita for dimi” ta un di e hopi declaracionnan di minister di Finanza Juan David Yrausquin diadomingo na su yegada bek na Aruba. Un mandatario visiblemente rabia na cierto momento y emocional na otro , a confirma cu su retiro ta final y cu e ta desea su coleganan tur cos bon. E mandatario a referi gran parti di e rasonnan pa cual e la entrega su retiro diabierna ultimo, pero porta mas importante awo, tambe a pone luz riba cosnan cu e la pasa aden durante su bishita corto na Hulanda. E no a sconde su rabia pa loke a sosode e ultimo siman, y sigur ora cu e la referi na e loke cu gobernador di Aruba a haci siman pasa, (no pone su firma bou di e presupuesto). Yrausquin a ripiti cu e ta considera esey un acto inconstitucional. Cu e determinacion di Yrausquin pa no bolbe como minister den e gabinete, gobierno di Aruba awor tin un reto nobo pa busca un otro minister pa e cartera di finanzas.

Segun Yrausquin, - reaccionando riba e acuerdo cu Gobierno a sera siman pasa- , e no a bisa cu e no ta sostene e acuerdo, pero a indica mas bien cu e acuerdo tabata uno necesario. Necesario pa garantisa continuacion di operacion di Aruba den termino financiero. Si e acuerdo no a wordo sera, nos lo a haya un aanwijzing, segun interpretacion di Yrausquin , argumentando cu esey lo a desemboca den un proceso largo di investigacion y control. Tur e tempo ey, lo no por a firma e presupuesto, cu consecuencia cu Aruba lo no por a cumpli cu su obligacionnan financiero. Como tal, segun Yrausquin su pensamento, Hulanda a basicamente pone Aruba cu lomba contra muraya, door di presenta e alternativa pa un ‘aanwijzing’. “Aruba no tabatin otro alternativa sino di bay di acuerdo cu e ‘acuerdo’ aki.

Cu su senjora Amy, y tambe su hefe di trabou, esta prome minister Eman, ministernan Paul Croes, Benny Sevinger y Mike de Meza, a clausura su comentarionan, repasando e loke e la haci durante e ultimo 9 lunanan. Un momento sigur emocional tabata ora cu e la referi na su casa Amy como su sosten mas grandi, durante su carera cortico como minister. Cu lagrimas den su wowo, Yrausquin a termina bisando “Sigur e tabata mi mihor consehero”.