Conocido periodista Aileen Looman a fayece

WILLEMSTAD – Conocido periodista di Corsou Aileen Looman a fayece diasabra mainta a consecuencia di cancer di pecho. E tabatin 59 aña di edad. Pa basta tempo caba Looman tabata lucha cu e malesa aki pero no a entrega facil. Asina cu e noticia di su morto a plama, por a mira un avalancha di comentario riba rednan social, debi na e popularidad di e periodista, considera como un di e mihonan di tur tempo na Corsou.

Aileen Looman na CNSJ na 2012

Aileen, pa sigur 15 aña tabata conduci e programa popular Moru Bondia na Telecuracao. Ademas e la yega di maneha e ekipo di noticia di e canal. Como tal e canal lo dedica varios dia di programacion na trabou di Looman, y tin un sinta preto riba su pantaya. Looman tabata un di e poco periodistanan cu a studia periodismo na Hulanda. E tabata traha tambe na radio Curom Z-86 den seccion di noticia, y despues tambe e corant Bala y radio Mas.