Departamento di Aduana a lansa su website nobo

ORANJESTAD - Departamento di Aduana a lansa su website nobo den compania di Minister di Finanzas, Director, Management Team y empleadonan y di e forma aki ta pone enfasis riba e importancia di innovacion y comunicacion. Innovacion y comunicacion ta dos elemento hopi necesario den e mundo moderno cu nos ta bibando y haci negoshi. Den cuadro di e dos elemento aki Departamento di Aduana ta lansa su website nobo www.douane.aw.

Departamento di Aduana ta invita pueblo completo di Aruba pa bishita su website moderno. E website nobo a wordo diseña pa ofrece un experiencia “user friendly”, cu mihor funcionalidad unda e usuario por nabega mihor y haña e informacion cu e ta busca sin cu e ta perde den un “jungle di informacion”.

E website nobo ta inclui informacion tanto pa publico como pa brokers y comerciante cu lo juda e usuario compronde mas over di e trabounan di Departamento di Aduana. E website nobo www.douane.aw a wordo diseña cu e meta pa ta “user friendly” “straight forward” y e ta compatibel cu diferente aparatonan manera computers, laptops, tablets, y smart phones.

Por añadi cu e website nobo di Departamento di Aduana ta duna e usuario acceso na tur e leynan y formularionan di douane como tambe na e sistema di Asycuda via di e login Asycuda.