WEB y Isotron a inicia construccion di ‘sunrise solar park’ cu groundbreaking

ORANJESTAD - Despues cu siman pasa a traspasa e tereno oficialmente pa WEB Aruba y despues cu WEB a firma e acuerdo cu ISOTRON, e socio principal di ‘Sunrise Solar Park’, diaranson ultimo a marca e inicio di e fase di construccion durante un ‘groundbreaking’ na Lago Heights. E ceremonia di groundbreaking a conta cu invitadonan special entre nan, Gobernador Alfonso Boekhoudt, Jose Maria Figueres y Sir Richard Branson di e internacional Carbon War Room, hunto cu prome minister Mike Eman y minister Mike de Meza, director di Utilities Aruba, Franklin Hoevertsz, director interino di WEB Aruba, Richard Frank y representante di gerencia di Elmar, Eric Tromp.

WEB Aruba ta considera e inicio oficial di e proyecto aki di 5.9 MW bou di e nomber di ‘Sunrise Solar Park’ como un logro grandi. E logro aki ta trece e compania di awa y energia mas cerca di meta pa cumpli cu e vision pa ta mas berde, mas limpi y liber di fuel oil. Na mes momento, e inversion di 16 miyon florin ta representa otro logro grandi pa e compania; Pa prome biaha den historia WEB Aruba lo ta doño di un proyecto di e magnitud aki.

Cu e parke solar, WEB Aruba ta sigui completa e lista di proyectonan solar cu tin den planificacion pa yega na un average di penetracion di energia solar di 5%. Segun Francis Ras, gerente di Division di Asuntonan Tecnico di WEB, den aproximadamente 8 luna comunidad di San Nicolas y Aruba henter lo exhibi un di e parkenan solar di mas grandi riba nos isla y tambe den Caribe.