Aruba awor tin ‘green bike’ tambe

ORANJESTAD – For di awe, Aruba tin un producto ‘berde’ nobo awe, cu mester yuda nos medio ambiente. Ta trata di e asina yama Green Bike Aruba cu a establece su mes oficialmente na Aruba. Hopi hende por a mira caba e diferente stacionnan di bicicleta rond di Aruba. Esnan cu a presenta e proyecto a sigura cu green bike ta un forma saludabel y sostenibel di transporte unda cu e bicicletanan lo ta disponibel pa comparti y ser uza den diferente area rond di isla. Green Bike Aruba tin 8 stacion di servicio y 100 bicicleta rond di Aruba. E lugarnan cu por haya e stacion di bicicletanan aki ta:

1. Paardenbaai plaza (otro banda di Aruba Ports Authority)

2. Entre Costa linda resort y Alhambra casino (Low-rise hotel)

3. Dilanti di La Cabana Beach Resort (Eagle beach)

4. Dilanti di Barceló Resort (Palm Beach)

5. Diagonal dilanti di Tony Romas dilanti di Paseo Herencia

6. Banda di Moomba Beach

7. Plaza Turismo (Linear park)

8. Plaza Daniel Leo (Oranjestad)

META DI GREEN BIKE

Esnan cu a bin cu e proyecto, a sigura cu green bike Aruba tin como meta pa ta un actividad pa relaha pero tambe un forma di transporte pa turistanan y localnan rond di Aruba. E tipo di compania aki di bicicleta a demostra di ta exitoso na diferente ciudad rond mundo manera New York, San Francisco, Boston, Chicago, Guadalajara, Toronto, entre otronan. Green Bikes ta ofrece un manera dibertido y saludabel di keiro y explora lugarnan di interes rond Playa y Noord.

KICO TA HACI GREEN BIKE ARUBA ATRACTIVO?

Esaki ta e futuro, como esun di mas responsabel, eficiente y e forma mas dibertido di move. Comparti bicicleta ta plamando positivamente rond mundo. E ta un actividad gusta y unda cu e wordo introduci e ciudadanonan ta adopt’e. E bicicleta ta e ultimo moda di transporte socialmente responsabel. Basicamente e ta funciona riba awa y alimento.