Vaders: Actitud di OM riba caso Paul Croes ta hopi straño

WILLEMSTAD – E forma con e caso di minister Paul Croes ta desaroyando, ta pone su abogado pensa pakico ministerio publico ta dal asina hopi buelta, y si enberdad nan tin algo concreto riba su cliente. Abogado di e mandatario, mr Marije Vaders a kibra silencio awemerdia pa NoticiaCla durante e noticiero NoticiaCla merdia na Power FM. Aunke Vaders no tabata den un posicion pa bisa mucho cos, a resalta cu pa straño cu ta zona, e no a ricibi ningun documento for di ministerio publico riba e caso di su cliente. Como tal mucho cos e no por a bisa, simplemente pasobra e no tin e informacion. Ta loke ta sali den prensa, ta loke cu e sa y nada mas. Mes momento Vaders a splica cu e posibilidad t'ey, cu pa otro siman elo por duna mas informacion, si e ricibi esaki tambe. Sea den un conferencia di prensa of un combersacion cu e portal aki.

UNICO ABOGADO PA E MINISTER

Probechando di e occasion, a puntra e abogado si (basa riba informacion circulando) e ta e unico abogado di e mandatario of cu si tin mas abogado ta asisti’e. “Mi ta e unico abogado”. E cargonan ta conoci caba den prensa, y e abogado no a elabora riba dje. A sigura si cu nada nobo no a bin acerca, contrario di loke cu a wordo bisa anteriormente.

DETENCION DI OTRO PERSONANAN

Pa loke ta e detencionnan cu a tuma lugar ayera y algun siman pasa, Vaders no por a bisa nada. “Atrobe, nos no tin ningun informacion di e caso, pues mi no por bisa si e caso ey ta corecto of no”.

NO POR HAYA DI INFORMACION DI MINISTERIO PUBLICO

Segun Vaders, tur hende por specula masha hopi cos na e momento aki. Pero e hecho cu OM no ta dunando ningun informacion, ta haci e caso dificil. Tanten, no por duna nada pasobra e lo keda na speculacion, kico ta kere, kico ta supone, pero no locual nan sa concretamente. “Mi ta haya e manera di actua (aki) sumamente straño”. Vaders ta admiti pa e portal aki cu e situacion aki, no ta uno normal, cu un abogado no por haya documento pa por defende su cliente. “E caso ta hopi specifico, ta hopi diferente cu otro caso. Anto p'esey mes nos ta hopi cauteloso, anto nos ta wak bon kico nos ta haci” Vaders a sigui bisa. Ta ora cu nan tin tur informacion, nan por bisa algo. E loke e ta bisa e abogado, pues su ‘gut feeling’ ta cu e manera di proceder di OM ta buta bo pensa riba hopi cos, si tin algo concreto. Y si tin algo concreto, no mester haci tanto buelta. Scucha e entrevista completo AKI. Foto ta di Vaders Advocaten.