Homber dominicano na Corsou extradita awe pa Merca pa droga

WILLEMSTAD - Corsou a extradita diaranson 31 di mei 2017 e homber R.A. (Republica Dominicana, 25 di september 1962) pa Estados Unídos. E homber A. a keda entrega na aeropuerto Hato door di funcionarionan di Team Crimen Organiza (DGC) na funcionarionan di US Marshalls di Estádos Unídos. Bou di custodia di US Marshalls ela subi un avion special cu a bin Corsou pa e transport'e pa Boston, Massachusetts.

Corte Comun di Husticia a dicidi 15 di maart 2016 positivamente riba e peticion di extradicion di Merca. Gobernador di Corsou seguidamente a declara e extradicion admisibel dia 25 di april 2017. Husticia di Estados Unídos ta sospecha A. di ta forma parti di un organisacion di droga cu pa medio di gulido di bolita ta transporta droga pa Estádos Unidos. Un otro sospechoso den e mesun caso aki, A.D.R.-J. ya caba a keda extradita anteriormente dia 22 di november 2016.

E extradicion a tuma mas tempo debi na e prosedura di casacion cu a keda inicia den e caso aki. Corte Supremo a trata A. su caso dia 14 di februari 2017. E peticion a keda rechasa pa Corte Supremo mientras cu e otro sospechoso su peticion a keda rechaza for di 20 di september 2016. R.A. i A.D.R.-J. A keda detene na december 2015 a base di un orden pa aresto di US District Court for the District of Massachusetts, esaki como inicio pa e proceso di extradicion.