NoticiaCla ta gana caso contra Awe Mainta den corte pa plagio

ORANJESTAD – E matutino Awe Mainta a viola derecho di autor di NoticiaCla.com y a wordo sentencia den pago di un daño di perhuicio. Asina hues a dicta awe mainta den un caso cu NoticiaCla.com a entama contra e matutino pa plagio. Ta trata di un articulo cu e matutino a copia literalmente, sin previo permiso y probecha di dje. Cu e sentencia aki, ta existi awor un hurisprudencia cu ta yuda otro medionan y duna nan e proteccion necesario pa evita cu otronan por djies coy articulo y potret y uza den nan mesun medio. Esey ta e logro mas grandi, mas cu e suma di daño y perhuicio.

E CASO MES

E caso ta data di un aña pasa ora cu e portal aki a publica un articulo basa riba un caso den corte, cu despues a wordo copia sin mas, completo cu potret riba portada di e matutino Awe Mainta, sin cu e tabatin permiso pa haci tal. NoticiaCla.com a bay corte cu e meta pa pone un fin na e constante ‘hortamento’ di articulo y potret sin mas pa probecho di e medio contrario. Hues den e caso aki a haya prueba cu Awe Mainta a copia e articulo literalmente incluso potret, siendo cu e no tabatin permiso. “Ta dificil consebibel, cu Awe Mainta como un partido profesional, a pensa cu e tabata trata cu textonan liber”, hues ta sigui bisa. Ademas ta prueba segun hues cu e matutino no a haci mencion di fuente. “A base di e hechosnan constata y e reglamento, Corte ta mustra cu Awe Mainta a viola derecho di autor. Esey ta ilegal”. Como tal hues a dicta cu Awe Mainta a viola e derecho di autor di e articulo di NoticiaCla.com, tanto pa potret y articulo y ta sentencia Awe Mainta pa pago di un suma di daño y perhuicio. Reaccion di abogado di NoticiaCla.com esta Mr David Kock ta indica cu aworaki tin un hurisprudencia pa cual medionan tin cu pensa dos biaha prome cu nan ‘tuma’ algo di otro medio y publica esaki sin permiso previo. E ta e regla basico di plagio. Grafico cortesia www.plagiarism.com. Lesa e sentencia completo AKI.