Tres detencion mas den investigacion penal di minister Croes

ORANJESTAD – Den caso di corupcion Ibis, envolviendo minister Paul Croes, a cay tres detencion awe mainta. Vocero di ministerio publico Ann Angela a confirma cu e tres personanan a keda deteni pa entre otro corupcion (omkoping) y complicidad den falsificacion. Ta trata di e homber inicial S(corupcion) y dos muher inicialnan V y M (complicidad den falsificacion), y tambe un compania cu su inicial B.E. Cu e detencionnan aki, e cantidad di persona deteni ta bira 4.

E PROME PERSONA DETENI

Tabata riba 16 di mei ultimo cu a detene e tussenpersoon J.F. riba sospecho di actieve ambtelijke omkoping den e investigacion penal “Ibis”, den cual entre otro, minister Paul Croes ta wordo sospecha di corupcion (ambtelijke corruptie), maluso di funcion y traficacion di hende. J.F. ta traha como tramitador di permiso. Tramitadornan di permiso ta personanan cu tin como profesion of cu tin un compania cu ta intermedia pa stranheronan ora di pidi permisonan di estadia. Nan ta cobra pa esaki. J.F. ta wordo sospecha di (entre otro) a paga minister Paul Croes, y en cambio e minister a supuestamente percura pa clientenan di J.F. haya ontheffing di e arbeidsmarkttoets, cu ta algo cu ta cay bao DPL.