Eman: DOW contra y comerciantenan pro pa habri caya grandi pa auto

ORANJESTAD – DOW ta contra pa habri caya grandi pa trafico, pero tin gruponan di comerciante cu si kier. Asina prome minister Mike Eman a confirma pa NoticiaCla e siman aki. Mientrastanto gobierno no a tuma un decision ainda si ta habri Caya Grandi (Caya Betico Croes) bek pa trafico, segun Eman na e portal aki. “E no a yega na un conclusion”, e mandatario a bisa. Tabata na fin di aña pasa cu a haci e prueba pa 2 siman pa wak con ta bay cu e ‘experimento’ aki. “Si nos habi’e un dia bek, e mester ta den un coordinacion hopi importante cu tur e tiendanan” Eman a sigui bisa. E ta pensa asina pasobra si habri’e y tin tanto rolluiken baha, lo no tin e efectonan pa e tiendanan. Loke si a confirma ta cu e comentarionan ta hopi dividi pa loke ta e decision cu mester tuma.

REACCION TA DIVIDI

Eman a confirma cu mientras cu no a dicidi ainda si ta habri caya bek pa trafico, cu a reuni si riba e tema. “Mi por bisa cu tin 3 opinion. Tin opinion di DOW cu ta hopi cla cu nan no ta hay’e un bon idea pa habri. Tin opinion di un parti di caya grandi cu ta haya cu esaki por yuda (habri caya), y tin un parti di poblacion cu no ta ni DOW, ni hendenan cu ta den caya cu ta gewoon admira e bunitesa di con caya a keda, y nan ta hopi hopi” Eman a bisa. E ta confirma tambe cu e mester a wanta hopi critica ora cu a dicidi pa habri’e brevemente. “Nan ta haye un doodzonde pa laga auto pasa riba dje” Eman a sigui bisa.

KI TEMPO LO DICIDI

Den e proximo temporada aki, lo tin un decision definitivo kico lo haci. Den e vacantie grandi tin eventonan planea pa caya grandi, y e ora tin un coordinacion pa loke ta kedamento habri. “Por tin un coordinacion di algun dia unda cu auto por pasa, etc” Eman a finalisa bisando. Pues no tin un fecha exacto cu lo anuncia e decision final. Hecho ta cu tin un division formal riba e pensamento di laga auto pasa den caya grandi atrobe of no. Scucha e entrevista cu minister presidente Eman AKI.