Warda Costa a gara 50 Venezolano drentando Corsou

WILLEMSTAD – Un total di 50 Venezolano, mayoria hende muhe, a wordo deteni awe marduga sea yegando Corsou of na Corsou caba di un forma illegal. Tabata durante un accion marduga di Warda Costa cu polis, a mobiliza avion y helicopter na area di Fuik, y a bin gara un boto saliendo di Corsou. A gara e boto aki y despues a gara e prome 40 ilegalnan. Despues a sigui mas buskeda y pone man riba 10 persona mas den mondi. Na tur pues 50 persona illegal cu a drenta y tabata purbando di drenta Corsou den oranan di marduga. A compronde cu algun cara tabata conoci caba pa autoridad, esta di hendenan cu a keda deporta caba, pero cu a bolbe drenta.

NO TA PROME BIAHA

No ta prome biaha cu autoridad atento na Corsou ta logra pone man riba personanan di Venezuela cu ta haci intento pa drenta e isla di un forma illegal. Cada bez e grupo aki ta aumenta mas y mas. E tabata prome na 10 nan tabata yega. Esaki a aumenta cu 10 y nan tabata drenta na 20. Awor esaki a yega un total di 50. Mester bisa si cu ta parti e gruponan aki na 20 cada biaha, cu ta mustra cu ta un negoshi tin di esnan cu ta yega, pues manera un boto cu cada bez ta busca 20 persona y ta transporta nan illegalmente pa Corsou (y posiblemente Aruba).