CFT a confirma diabierna cu lo entrega rapport otro siman

WILLEMSTAD – Presidente di College Financieel Toezicht, Age Bakker a confirma e primicia di NoticiaCla.com diabierna merdia durante un almuerzo pa Vereniging Bedrijfsleven Curacao (VBC) na Corsou, cu gobernador di Aruba lo ricibi e rapport final di CFT otro siman na Aruba. Den e discurso, titula “Government finance and beyond, who can bring the economy back in motion” e la splica e situacion financiero di e islanan di Reino Hulandes y a toca Aruba dado momento.

E ta mustra cu mientras cu practicamente tur pais den region di Caribe Hulandes ta bou di un tipo di supervision financiero, Aruba no ta den e categoria ey. Asina mes e ta mustra cu CFT a wordo pidi pa yuda investiga y presenta un rapport pa ‘yuda prome minister Mike Eman den su plan ambicioso pa yega na un presupuesto na ordo den e proximo anjanan’. Den e mesun cuadro e la confirma cu ‘otro siman CFT lo presenta e rapport final na gobernador di Aruba.

Cu esey e ta confirma cu e rapport ta kedando cla. De hecho NoticiaCla.com tin confirmacion cu e rapport ta cla caba y cu e prome parti a keda entrega caba y ta wardando comentarionan inicial di parti di gobierno. Pa dia 12 di september, manera cu NoticiaCla.com a raporta caba den forma di primicia, gobernador lo ricibi e rapport final, despues di cual e lo presenta esaki na gobierno y gobierno di Reino. Gobierno di Aruba e ora tin 3 siman pa reacciona ariba. E foto ta mustra momento cu Age Bakker tabata hiba su discurso na Corsou diabierna merdia.