PAWA lo transporta 119 Arubiano pega na St Maarten bek pa Aruba

PHILLIPSBURG – Pawa Dominicana a informa cu despues cu a cancela nan buelo 7N 720 dialuna di St Maarten pa Santo Domingo debi na mal tempo, nan lo transporta e 119 pasaheronan Arubiano pega na St Maarten bek pa Aruba, un dia despues esta diamars 30 di mei.

REGLA Y EXCEPCION

Normalmente e aerolinea ta obliga pa transporta e pasaheronan riba e proximo buelo of reembolsa e gasto pa e porcion no uza di e buelo. Asina Alexander Barrios di PAWA a bisa den un comunicado. Pero debi cu mayoria di e pasaheronan ta teenager y mucha cu tabata participa den un torneo regional di softball, PAWA a dicidi di haci e buelo extra den e forma aki pa minimalisa e tempo cu e muchanan lo a pasa for di nan cas.

MAL TEMPO NA ST MAARTEN

Un ola tropical a percura pa tempo malo riba e isla den fin di siman, causando problema serio pa e isla. Cayanan inunda y mas problema a pone cu negoshi y scolnan tur tabata cera dialuna. E aeropuerto di e isla, Princess Juliana International Airport mester a para su operacion, resultando den cancelacion di por lo menos 12 buelo di otro aerolinea tambe. E fotonan ta mustra e.o. e daño cu e isla a pasa aden debi na inundacion causa pa awacero torencial a consecuencia di e ola tropical.