Prome minister ta contradeci DOW riba ekipo di proteccion pa limpiesa

ORANJESTAD – Despues cu director di DOW Marlon Croes a bisa NoticiaCla dialuna mainta cu nan no tin ekipo special di proteccion (pa atende cu limpieza di oil spill), y cu nan ‘a laga busca esaki’, prome minister Mike Eman a contradeci e director algun ora despues den un conferencia di prensa, informando cu ‘Aruba tin suficiente ekipo di proteccion’. De hecho, e portal aki awor ta compronde cu un dia prome te hasta DOW a ricibi e ekipo aki, pero no a uza esaki. Con bin e trahadornan no a bisti esaki, no ta conoci pa e portal aki. E portal aki a compronde tambe cu awor a ordena tur trahado cu ta bay haci trabou di limpiesa, pa obligatoriamente bisti e pañanan aki entrante diamars mainta.

E PROME INFORMACION

Awe mainta e portal aki a raporta cu ‘pa straño cu por zona, Aruba no tin e ekipo special pa bisti pa proteccion contra chemicalnan peligroso’. Tabata e propio director di DOW Marlon Croes cu a confirma cu ‘no tin na Aruba, pero cu a manda busca caba’. Despues ora cu e portal aki a puntra prome minister Eman awe mainta si e material aki no ta peligroso y pakico no ta bistiendo paña special, el a confirma cu enberdad e material ta peligroso. “E crudo cu tin aki tin kimico den dje cu no ta bon pa bo cuero y cu ta aconsehabel pa no mishi cune cu man” Eman a sigui bisa e portal awe mainta. Den e caso di e oil spil e siman aki, a nota cu trahadonan di DOW y di parke tabata traha cu pana normal, y handschoen regular, envez di e paña special manera cu por a mira na Bonaire y Corsou. Mientras cu eman ta sigui bisa su tras cu nan ta conciente di dje, toch nan ta haci otro. “Sinembargo nos tur a yega ki, y nos tur a mishi cu man cu tur y ban spera cu nada pasa cu nos. Nos ta duro” Eman a bisa cu un sonrisa. Esey no ta kita afo cu e ta sumamente peligroso manera cu e ekiponan ta trahando. Mesora ora cu e portal aki a publica e prome imagennan, e preguntanan di comunidad a surgi, con bin no ta bistiendo trahe protector.