Version nobo di e NoticiaCla APP cu mas posibilidad obtenibel awor

ORANJESTAD – Algo mas cu dos luna despues cu NoticiaCla a lansa su app, nos ta contento pa anuncia cu e version mas nobo di e app ta cla pa download. E version mas nobo tin algun adaptacion y cambio cu ta hacie’le aun mas placentero pa uza. Depende di e 'settings' di e usuario, e update por sosode automaticamente, sino e usuario tin cu haci esaki manualmente.  Entre e cambionan mas grandi ta e size di e letter (font) cu a wordo haci mas grandi pa por lesa miho. Tambe e ‘linknan’ pa cada documento of otro relato, tambe a wordo drecha. Ademas awor e usuario por ricibi diferente tipo di notificacion, fuera di solamente ‘breaking news’. Ora cu un usuario haya un notificacion di un noticia (no necesariamente breaking news), e usuario awor ta djies ‘click’ riba e titulo y e ta hiba e usuario automaticamente na e texto. Esey no tabata posibel anteriormente. Tambe e usuario por awor haya notificacion cu ta mas bien mensahe general di e servicio di NoticiaCla.com. Ta conoci cu ora cu saca app, ta bin updates frecuente cu ta mas bien pa ‘drecha’ cualkier fayo chikito (bugs) y/of añadi cosnan nobo. E bachi nobo cu e app ta aden aworaki, ta conta pa usuarionan di iphone y ipad primordialmente. E usuarionan di android ya tin e cambionan aki hinca aden for di comienso. Keda pendiente pa aun mas servicio na caminda pa usuarionan. Danki pa e aceptacion. Pa esnan cu ainda no a download e app, por haci esaki via e app store di iphone/ipad of e google play di android!