WEB: Nos awa di bebe ta safe y no ta afecta pa oil spill

BALASHI – E awa cu nos ta bebe for di kranchi tur dia ta safe. “Nos awa di bebe ta safe” vocero di e compania di utilidad WEB, Asja Dongen a sigura NoticiaCla dialuna atardi. Esaki despues cu tabatin hopi pregunta riba e calidad di awa relaciona cu e derame di zeta y e patchnan di zeta cu a spula bin tera na Aruba den weekend. “WEB a instala un 'boom' extra cu ta bou di lama, banda di esun regular na e intake di awa” Dongen a bisa. Ademas WEB ta den estrecho contacto cu bureau rampenbestrijding pa monitor e desaroyo di e oil spil” Dongen a sigui bisa. Como tal no tin ningun motibo di panico, e compania a sigura e portal aki.

CERTIFICACION

Ademas a compronde cu e proceso di produccion y distribucion di awa ta ISO certifica. Esaki ta nifica cu nan ta garantisa e calidad di awa ta bon pa bebe. “Nos ta mantene autoridadnan competente na altura e cualkier desaroyo” e vocero a finalisa bisando.

E DERAME

Manera ta conoci for di fin di siman autoridad local ta atendiendo e situacion di e spill (derame) di zeta cu ta procedente di Trinidad, y cu a yega costa norte di Aruba den fin di siman. Mientras cu e derame a afecta e costa norte, ainda no tin ningun indicacion cu esaki lo yega costa sur unda cu e.o. WEB ta ricibi su awa cu e ta procesa despues den awa potable. For di ey a bin e miedo den comunidad cu e awa lo por ta afecta tambe debi na e derame. Algo cu awor WEB ta desmenti totalmente.