No tin paña special na Aruba pa trata e patchnan di zeta peligroso

BOCA PRINS – Pa straño cu por zona, Aruba no tin e ekipo special pa bisti pa proteccion contra chemicalnan peligroso. Den e caso di e oil spil e siman aki, a nota cu trahadonan di DOW y di parke tabata traha cu pana normal, y handschoen regular, envez di e paña special manera cu por a mira na Bonaire y Corsou. Director di DOW Marlon Croes a confirma cu no tin na Aruba, pero cu a manda busca caba. Ora cu e portal aki a puntra prome minister Eman awe mainta si e material aki no ta peligroso y pakico no ta bistiendo paña special, el a confirma cu enberdad e material ta peligroso. “E crudo cu tin aki tin quimico den dje cu no ta bon pa bo cuero y cu ta aconsehable pa no mishi cune cu man” Eman a sigui bisa e portal awe mainta. Mientras cu eman ta sigui bisa su tras cu nan ta conciente di dje, toch nan ta haci otro. “Sinembargo nos tur a yega ki, y nos tur a mishi cu man cu tur y ban spera cu nada pasa cu nos. Nos ta duro” Eman a bisa cu un sonrisa. Esey no ta kita afo cu e ta sumamente peligroso manera cu e ekiponan ta trahando. Mesora ora cu e portal aki a publica e prome imagennan, e preguntanan di comunidad a surgi, con bin no ta bistiendo trahe protector.