Aruba a intensifica accion contra situacion di oil spill

BOCA PRINS – Despues di a tuma nota personalmente di e situacion na costa norte, autoridad local a intensifica e accion contra e efectonan di oil spill di Trinidad. Manera ta conoci for di weekend Aruba a keda afecta pa un oil spill cu mescos cu Bonaire y Corsou, a yega costanan di nos isla. E situacion di e patchnan di zeta cu a yega Aruba ta mas pio cu prome a imagina. Departamentonan di gobierno hunto cu NGO's awe mainta (DOW, PARKE ARIKOK, RAMPENBUREAU, ARUBA BIRDLIFE) lidera pa prome minister Mike Eman a bishita e costa norte pa tuma nota di e situacion personalmente. E prome sitio bishita tabata Boca Prins. “Preocupante” Eman a bisa NoticiaCla na e sitio. Segun e prome minister e situacion por tabata pio, pero e por bira pio ainda. “E ta mas bisto y mas impactante pa realiza cu tipo di peligernan aki ta na un skina pa sosode” Eman a bisa. A mustra cu mester tin mas responsabilidad pa cu cosnan asina y cu den 2017 cosnan asina no por sosode.

TRABOU CU TA WORDO HACI

Eman a confirma tambe cu mirando loke nan a bin haya awe mainta, compara cu loke nan a wordo informa ayera, a dicidi pa intensifica e trabounan di limpieza y accion. “Nos a caba haya notificacion cu Kustwacht hunto cu marina ta intensifica e sondeo riba laman, mira kico mas por bin” Eman a bisa. E crudo pisa ta net bou di e superfisio di laman, cu ta dificulta e anuncio di yegada di e partinan di zeta, procedente for di Trinidad.