DOW: Habitantenan San Barbola mes a expande e ‘bufferzone’ pa e caminda

ORANJESTAD – Habitantenan di San Barbola a protesta diabierna ora cu dado momento nan a sinti cu nan besindario tabata wordo destrui pa trabounan di DOW. Conciento cu tabata trata di trabounan relaciona cu e Watty Vos Boulevard, nan a hala atencion di DOW mesora cu a duna splicacion di kico ta pasando. Nan preocupacion tabata cu a ‘viola’ acuerdonan di construccion ora cu ta trata e area ey. DOW su director Marlon Croes a splica NoticiaCla diadomingo cu varios comentario ta valido, pero tambe tin cosnan cu no ta berdad.

SAN BARBOLA MES A CAMBIA BUFFERZONA

E habitantenan tabata critica cu a palabra un cierto distancia di e casnan pa cu e caminda mester a bin, y cu e caminda ta mucho mas cerca cu ta ‘palabra’. Croes a splica cu enberdad tin un distancia acorda, pero cu cierto caminda ta propio habitantenan di San Barbola a pidi pa extende nan area y consecuentemente a yega mas cerca di e futuro caminda. Esey a pone cu obviamente e caminda ta mas cerca. Inicialmente tabatin un bufferzone di 8 meter, pa duna ‘right of way’, y despues uno di 7 meter. Pues hunto tabatin 15 meter di bufferzone di e zona residencial pa e caminda. Pero dado momento habitantenan a haya expancion y consecuentemente a reduci e bufferzone.