DOW: Trabou nan tumando lugar pa proteha flora y fauna riba ruta di construccion

ORANJESTAD – Den cuadro di e trabounan di e.o. construccion di Watty Vos Boulevard, DOW a informa cu tin un protocol firma cu un grupo di NGO’s, pa hunto trata na evita mas daño posibel na nos naturalesa, durante curso di e proyecto aki. Den cuadro di esaki, a cuminsa scan e area envolvi pa wak unda tin mester di proteccion di nos flora y fauna. E colaboracion ta entre LVV (Santa Rosa), DNM, Parke Nacional Arikok y Aruba Birdlife Conservation. Trabounan a cuminsa pues pa scan e trayectoria cu e prome 350 meter cu a wordo haci for di e caminda di meiveld patras di Codemsa bayendo direccion San Barbola. E scan ta percura cu ta laga tur areanan necesario protegi y marca pa evita daño.

AREA VIGILA Y MARCA

E gruponan menciona a cana den e areanan aki, sondea wak matanan cu ta valioso pa por mantene. A identifica nan cu un cinta pa ora cu e contratista haci su trabou, e no ranca nan bay cu nan. Ademas e fundacion Parke Arikok a scan e area pa fauna, pa wak si tin lugar di broei shoco, y otro tipo di pahra y/of reptil den e area. No a haya nada significante den e prome 350 meter. Consecuentemente, matanan cu a wordo identifica lo wordo excava, coba rond dje, saca cu su raiz y tera y ta wordo transporta pa Santa Rosa, unda cu ta bay den e ‘nursery’ di e lugar pa cuido, y por re-usa esaki den e area despues. Parke Arikok a bay mas leu, (150 meter extra) y eynan si a haya algun neishi di shoco (7). E contratista siguiente mente a marca diabierna y diasabra e caminda pa core pa e proyecto y mira si nan ta cay riba ruta di e neishi nan di e shoco nan, y a base di esey, lo sigui haci esaki dialuna awor. Si ta necesario ta prepara tur cos pa evita cu e neishi nan lo cai afo.