Stichting Parkietenbos cu ultimatum pa Gobierno riba dump

ORANJESTAD - Stichting Parkietenbos a bin cu un ultimatum pa gobierno pa soluciona e problema di dump. Di otro forma, lo denuncia e dump di Aruba na nivel internacional como un desastre ambiental. Asina e fundacion a informa pa medio di un comunicado diadomingo. Segun e fundacion, for di aña pasa Stichting Parkietenbos a tene diferente reunionnan cu gobierno, pero ta parse cu esaki no a duna resultado. Y como tal awor ta basta y a duna gobierno un siman di tempo pa reuni cu nan y bin cu un solucion.

TRAYECTORIA

Segun e fundacion, tabata durante 3 ocasion cu ministro presidente Eman, ministro de Meza hunto y nan team, pa asina informa nan di e situacion desastroso y peligroso di e Dump na Parkietenbos. E dump manera ta conoci, a bay over y ta yen di materialnan toxico cu ta emitiendo gasnan peligroso pa salud humano y hasta bay over den laman. E dump a crece enormemente y practicamente a kita derecho legitimo di e pueblo den e barionan di hala rosea di aire fresco y ademas di esey e dump ta forma un peliger pa e medio ambiente especialmente pa nos bida marino. Segun e fundacion, estudionan a confirma cu tin polucion serio den awanan y tera rond di Parkietenbos. Cu e clima instabil di ultimo añanan, constantemente e biento ta cambia mandando asina e huma di kimamento di sushi y e holo di gasnan di polucion den e hogarnan di e bario. E tipo di polucion nan aki por causa problemanan respiratorio, incidencia mas halto di cancer, problema di riñon, di higra, malesa nan neurologico, alergia y malestar nan en general. E polucion cu ta bin di e dump por ta provocando ainda mas tipo di malesa cu nos no sa di dje ainda ya cu e ta consisti di un variedad grandi di tipo di polucion. Aña pasa y e aña aki hopi ta e famianan cu a raporta cu nan a bira malo, nan yiunan a haya asma, otro a haya cancer y tin otronan cu a haya alergia cronico. Stichting Parkietenbos ta preocupa pa e habitantenan di e bario y pa e trahadornan cu ta traha rondona pa e polucion. E fundacion a hala atencion di Ministronan di Gobierno na multiple ocacion y a ser priminti cu nan lo traha riba un solucion rapido a corto plazo y uno a largo plazo. E aña aki mester a habri cu implementacion di e solucion a corto plazo.

TEMPO A PASA

Ya 5 luna a pasa y awor ta 7 aña y mei caba Gobierno a neglisha e Dump y e planta di procesamento di sushi estableci na e sitio. Den e barionan cerca tin un cantidad di caso di muchanan y nan mayornan cu ta malo, hende cu cancer straño cu mester a muda hunto cu nan yiunan pa otro bario. E habitantenan ta hopi rabia pasobra ta papiamento so tabata tin te awor, ningun atencion y accion serio di departamento concerni tampoco a tuma lugar.

ULTIMATUM DI UN SIMAN

Awor e fundacion a tuma e paso pa duna gobierno un ultimatum di un siman pa reuni y presenta cu solucion serio y rapido. Si esaki no sosode lo denuncia Gobierno di Aruba na nivel internacional cu nan ta violando e tratado di Cartagena y su protocol nan y cu nan ta hincando salud di henter un pueblo den peliger. Tanto stichting Parkietenbos, habitantenan di bario I di a Aruba en general ta masha desapunta pa motibo cu te dia di awe esnan responsible di parti di Gobierno pa cu e situacion di e dump na Parkietenbos no tin un maneho cu ta cumpli cu normanan.