Delegacion hulandes pa atende imigracion Aruba otro siman

DEN HAAG – Fuera di e bishita relampago di secretario general di asuntonan di Reino Hulandes Richard van Zwol, e director general di husticia hulandes Gerard Roes tambe ta biahando pa Aruba den e delegacion hulandes. Fuentenan fidedigno for di Hulanda a confirma na NoticiaCla.com cu Roes ta bin den cuadro di e ‘situacion problematico di imigracion’ na Aruba y posibel iregularidadnan den e departamento di Dimas. No a indica kico nan kier men cu e ‘problema’ aki, pero esey ta e informacion ricibi. Durante e bishita aki lo tin cu analisa e situacion aki, pa raporta esaki bek na minister Plasterk. E bishita ta cuminsa diadomingo merdia y ta termina dialuna atardi.

Pa loke ta e bishita di van Zwol, (cual NoticiaCla.com a raporta ariba anteriormente), tin informacion cu ta trata di cierto ‘asuntonan’ cu a tuma lugar durante e periodo cu premier Mike Eman tabata den su welga di hamber, y cu cierto desisionnan a wordo tuma cu no a cay na agrado. Lo kier a investiga y papia personalmente cu e ‘protagonistanan’ pa haya sa kico a pasa y con serio e asunto aki por ta.