Mester mehora e confiansa den Corte y huesnan

ORANJESTAD – “E confiansa (den Corte, sentencia di huesnan y e huesnan mes) mester ta miho cu loke e ta aworaki “. Asina vice presidente di corte di husticia Peter Lemaire a bisa NoticiaCla.com e siman aki. E pregunta riba confiansa ta basa riba e vision cu corte mes a presenta den nan programa di vision di Corte di 2017-2021. “Corte lo sigui desaroya su mes den cuadro di mehoracion di e calidad di sentencia, y salvaguardia e confiansa den Corte” e vision ta bisa. Mientras cu vice presidente di corte Peter Lemaire ta admiti na e portal aki cu mester traha riba e confiansa, e no ta sigur si den e islanan di Reino Hulandes a midi e confiansa ey. Algo cu segun e magistrado, si a sosode na Hulanda.

MIDI CONFIANSA DEN CORTE

E vice presidente di hof a splica e portal aki e midimento na Hulanda. “Eynan e percentahe di confiansa ta midi na entre 70 cu 72%”, Lemaire a bisa, aunke den mesun rosea e ta sigura cu e confiansa ta varia den e bista cu comunidad tin riba e aparato gubernamental den su totalidad. “Mi lo spera cu (confiansa) den e islanan aki lo no ta diferente”, Lemaire a sigui bisa. E intencion ta sigur pa mehora e confiansa door di provee mas frankesa y duna mas splicacion na e sentencia nan cu ta wordo duna. “Tambe door di haci nos mes mas visibel y evita pa hendenan aki mira nos como un ‘elemento Hulandes straño’ den un otro comunidad” e magistrado a sigui bisa. Tur ta cosnan cu nan ta trahando ariba pa logra nan meta, pa por sigura e confiansa di comunidad y cu Corte tin wowo pa e comunidad y por confia Corte, cu e huesnan no ta corupto, y cu nan (huesnan) por wordo atendi riba cosnan cu no ta bon. “E (confiansa) mester ta miho cu loke e ta aworaki. Lo ta un bon idea pa midi den comunidad con e confiansa ta pa loke ta Corte y e huesnan”. Scucha e entrevista COMPLETO cu Hues Lemaire AKI.