The Mill Resort ta bira Courtyard Resort by Marriott

ORANJESTAD – The Mill Resort na Aruba lo cambia pa Courtyard Resort By Marriott. Gerente general nobo di e hotel Willie Chin a confirma esaki pa NoticiaCla.com. Segun e gerente recien apunta, e intencion ta pa proximamente e renobacion di e hotel cuminsa, y cu lo tin un duracion di aproximadamente 1 aña. Motibo ta cu elo sosode den fase, ya cu e intencion ta pa e hotel keda den operacion durante e transformacion di The Mill pa Courtyard. Actualmente tin un Courtyard na Bonaire.

CAMBIO POSITIVO

Chin ta considera su yegada como gerente general nobo, uno critico mirando cu elo ta guiando e proceso aki. Lo cambia gran parti di e hotel, for di camber, interior di restaurant, bar y tambe di e hotel mes. Practicamente lo no reconoce loke e ta(bata) como The Mill. No solamente mester haci cambio fisico na e propiedad, sino tambe na e tipo di servicio y amenidad cu e hotel lo ofrece despues. Tur ta rekisitonan estricto di e cadena hotelero renombra Marriott. Ta ora cu tur cos ta cla, lo por pasa pa cambia e nomber di The Mill Resort pa Courtyard Marriott. Entre e cambionan, lo tin e pooldeck, un bar nobo, restaurant y manera indica, e fachada (e front di e hotel). Tur pa cumpli cu e rekisito di e cadena hotelero Marriott. Esey ta nifica cu aki un aña, Aruba lo tin un Courtyard Resort by Marriott tambe.