Aruba parti di complot pa yuda Syria evadi boycott Mericano

WASHINGTON – Aruba mester a bira parti di un plan pa yuda Syria y Venezuela evadi sancion internacional contra Syria, uzando transporte di petroleo. Asina e agencia di noticia Bloomberg a raporta awe. Aunke e plan no a sigui, e implicacion ta grandi. E plan tabata pa bende petroleo di Syria cu un descuento grandi pa medio di un compania Ruso ficticio, cu lo a mand'e pa Aruba pa refina y distribui pa companianan gasolinera na Merca y otro pais. Nombernan di cierto personanan local ta wordo menciona den e articulo tambe. Documentonan, emails y entrevista cu Bloomberg a conduci, a revela esaki.    

PLAN DI HOPI TEMPO

E plan, tabata tempo cu e refineria Valero tabata encarga ainda y cu Hugo Chavez tabata presidente di Venezuela ainda. Segun Bloomberg, no ta mucho cla si e plan ta den consideracion ainda pa ehecucion.

NOMBERNAN TA IMPLICA ARUBA

Den e articulo, tin nomber di un comerciante petrolero Wilmer Ruperti cu a confirma segun Bloomberg, su participacion pa medio di un entrevista telefonico. Mes momento ela sigura cu e no tin parti mas den e caso aki. Ruperti lo a huur un cas luhoso na parti norte di Aruba, y a haci esaki via un agente di real estate, Oscar Helmeyer. Ruperti lo tabatin wowo riba refineria Valero, cu a caba cera su portanan na 2012. Ta haci mencion cu Ruperti lo a ofrece Helmeyer 15 miyon pa yuda cumpra e refineria. E agencia noticioso ta confirma den un entrevista, cu Helmeyer ta admiti cu Ruperti a topa cu prome minister Mike Eman y Mike de Meza. E intencion di e plan, segun Ruperti a splica – e tempo ey embahador di Syria - Ghassan Abbas na september 2012, ta pa evadi un boycott Mericano y comunidad Europeo.

SITUACION ACTUAL

Un oficial di Citgo a bisa cu e compania actualmente no ta considerando y lo no considera importacion crudo Syrio pa suministra na Citgo Aruba.”E compania ta comprometi na e operacion di Refineria Citgo Aruba cumpliendo cu tur ley aplicabel y esey ta inclui tur ley di sancion Mericano” e oficial di Citgo a bisa Bloomberg.

CONOCEMENTO DI ARUBA

Segun Bloomberg, gobierno di Aruba ta desmenti di sa algo di e plan petrolero Syrio, y ta premira cu e eleccion na september por bira un pion. ”Kico cu pasa cu e refineria, e plan desenmascara pa cu e reapertura di e refineria, ta lanta pregunta di posibel esfuersonan cu no a wordo expone” e agencia ta sigui bisa. Foto Ben Bartenstein/Bloomberg