A cera varios restaurant pa falta di permiso y higiena

ORANJESTAD - Riba diamars 16 y diahuebs 18 di mei ultimo, entre 9:00 am y 4:00 pm a tuma luga un accion riba varios restaurant y "take away's" den area pariba di brug. E accion a conta cu representacion di DOW, Cuerpo di Bombero, Departamento di Salud Publico, seccion di Malesanan Contagioso y tambe cu Cuerpo Policial Aruba.

Den e proceso, pa motibo di no ta cumpli cu reglanan di higiena, autoridadnan a laga cera "The House of Cakes", "Dos Reis" y "Super Fruteria Dominicano". Tabatin casonan mas serio, manera "Win Wag", cu no tabatin ningun tipo di permiso di establecimento, pa cual a cer'e permanentemente. La Granja na Savaneta tambe mester a cera pa falta di permiso y pa no ta cumpli cu reglanan di higiena.

Diahuebs durante control a bishita Baby Beach Snack, Rey Hing Bar & Restaurant y Pos Chikito Rum Shop. Di acuerdo cu e rapport di e autoridadnan competente, despues di un control di nobo, e restaurantnan por a habri nan porta bek, cu excepcion di Wing Wag na Savaneta. Na tur, e departamentonan participando den e accion a bishita un total di 50 negoshi di HORECA, den e districto di San Nicolas y pariba di brug.