Ainda no ta cla pa introduci WIFI gratis den centro di ciudad

ORANJESTAD – Acceso gratis na internet den nos caya principal na Oranjestad, conoci como Caya Grandi (Caya Betico Croes), ainda no ta regla. De hecho, e mandatario di telecomunicacion no tin un indicacion ainda ki tempo esaki ta keda cla. Mientrastanto Aruba Tourism Authority a caba anuncia free WIFI na por lo menos 5 lugar remoto rond di Aruba pa turista. “Nos ta bezig cu ne” Arends a bisa, indicando cu e tin cu wak e detayenan di e proyecto. ‘Obviamente segun e resultado di e ultimo Hackaton, pa bo tin WIFI den Caya Grandi ta esencial” Arends a bisa. E ta referi na e proyecto innovativo y e team cu a gana e premio cu ta desaroyo di un app cu ta funciona den Caya Grandi. “Nan tabata basta avansa caba” Arends a bisa refiriendo na e trabounan di Setar riba e tereno aki. “Ta algo di wak e cantidad di interferencia cu tin” e mandatario a bisa. E ta esencial pa tin bon WIFI, y no tin ora cu e ta cay afo. E problema cu tin ta cu hopi construccion ta netamente di beton, cu ta stroba e señal hopi biaha di yega. E trabou mas grandi ta e estudio pa tin acesibilidad, unda pa pone p.e e modemsnan, pa wak con e ‘reach’ ta den henter caya grandi. Obviamento ta mirando si por expande pa Wilhelminastraat y otro cayanan. E no por a duna un fecha specifico ki tempo por spera cu e proyecto lo keda cla.

HABRI CAYA Y PONE FREE WIFI

Na december ultimo gobierno a haci algun anuncio grandi unda cu entre otro a figura cambio di orario di parkeer, habrimento breve di caya grandi pa por tin trafico di auto, y tambe bin cu WIFI gratis. E ultimo aki ainda ta parce e reto cu mester surpasa.