DOW: Circulacion di trafico San Nicolas Oranjestad a mehora

ORANJESTAD - Trabounan recien completa riba e caretera na Isla di Oro na Pos Chikito combina control di Policial y diferente otro factor mas a yuda cu awor e fluho di trafico ta moviendo mas rapido cual ta haci cu chauffeurnan cu ta trafica tur dia riba e ruta aki ta un poco mas contento yegando trabou na ora. Asina DOW ta informa den un comunicado. Sinembargo mester bisa cu tin diferente areanan di trabao ainda cu ta activo y cu por influencia e trafico na cualkier momento, p'esey mes DOW ta pidi comprension pa e situacionnan aki cu por surgi. Na e momentonan aki por ehempel mitar di e rotonde di Pos Chikito ta cera y un ruta alternativa ta ser uza, otro siman e otro banda di e mesun rotonde aki lo ser cera pa asina por completa e trabounan di renobacion di e brug di peaton.

Ta bon pa menciona tambe cu tin un trabou grandi cu lo mester tuma lugar na Jara. DOW lo suministra mas informacion tocante e parti aki di trabounan otro siman pa motibo cu e trabounan menciona na Jara lo bay tin su influencia atrobe riba e fluho di trafico. Sinembargo e trabaonan aki ta di vital importancia pa completa e parti aki di e Green Corridor. DOW ta pidi tur chauffeur y pueblo di Aruba en general pa sigui e informacionnan den media segun e trabounan ta avansa pa asina un y tur por ta na altura di tur desaroyo relaciona cu Green Corridor y Ringweg 3 - Watty Vos Boulevard. Pa mas informacion por bishita nos facebook page: DOW Aruba.