Analisis 3: Partimento di sticker vs programa di partido

Si no ta partimento di sticker tin, pegamento di palo di bandera na casnan (cu ya caba ta miembro di partido) y bendemento di cuminda na cantidad, e informacion mes cu nos mester no t'ey ainda: programa di partido. E ta mustra madures politico pa bin cu programa di partido pa asina e pueblo votador por scoge consciente a base di contenido. Dos partido ta trahando 'publicamente' riba na programa y a priminti e lansamento di esaki pronto. Ban wak. Politiconan hopi biaha ta haya nan confronta cu hendenan cu ta pidi nan fabor ora nan pasa campaña, pero parti di e culpa ta cerca nan mes cu e mentalidad aki no ta cambia mes lihe cu nos kier como pais. Si nan ta keda sin divulga nan programa di partido, for di miedo pa otro bay copi’e, nan mes no ta stimula discusion riba contenido di temanan importante. Claro cu e realidad cu nos ta biba aden ta, cu un gobierno na mando, pa debilita oposicion, ta uza triki di tuma e puntonan cu ta resalta y ehecuta nan den e ultimo lunanan cu falta. Esey ta pone partidonan duda na specifica nan plannan, locual lamentablemente cu laga solamente esfuerso di ban haci bochincha, yena bario cu hende, bandera, sticker, y haci como si fuera cada bario ta pinta na e color ey.

POLITICA BIEU OF FORZA NOBO?

Un lema anterior di e partido geel, ‘Aruba ta geel’, cu a bira un cancion popular, awor ta parce di a cambia y pasa pa e partido na mando: ‘berde e ta!’. Un otro partido aworaki kier pa bo kere nan cu nan por tur cos. Nan ta practicamente e solucion pa tur problema. Un partido cu ta bin cu e filosofia cu mester deshaci di politica bieu. Anto e mesun siman, nan lider ta cuminsa un listramento contra otro partido of simpatisantenan, alegando corupcion, mientras cu e acto mes cu e mester a coy, no a tuma lugar. Ta un dia despues, e politico a dicidi di haci e cos ‘corecto’, esta denuncia e acto ‘corupto’. Mientrastanto otro partidonan cu no tin representacion ainda den parlamento, ta purba logra haya atencion uzando rednan social manera facebook aki aya, tene programanan na algun radio, pero manera e encuesta a revela, no ta haciendo e impacto cu nan lo kier mira ‘ainda’. Pa nan ta un ‘player’ den e eleccion, nan mester haci cambionan drastico, sino nan soño di drenta parlamento, por keda netamente esey; Un soño. Y por ultimo, candidatonan ta wordo presenta awor, uno tras di otro. Uno cu mas buya tras di otro. Y loke ta resalta ta cu tin hopi caranan ‘bieu’ apareciendo riba un partido ‘nobo’. Bueno, caranan conoci, cu tabata riba otro partido, cu awor ta uni cu un partido diferente. Si esey ta bay haci e diferencia, tin cu wak ainda. Pa un partido, e ta mustra cu e ta dunando resultado. E partido Por, ta e unico nobo chikito, cu tin un chens den e proximo eleccion. Por lo menos, segun e encuesta di NoticiaCla.com, haci recientemente. Nan tin por lo menos 4 politico cu tabata riba otro partido y cu awor a uni forsa. Y nan tur ta popular. Esey ta yuda. Pero si e ta suficiente, tin cu wak ainda. Y tin e problema den partido berde, cu un minister cu ta minister pero no ta minister. Esey ta keda pa proximo biaha.