Afpakteam Corsou a confisca 3 cas

WILLEMSTAD - Afpakteam Corsou  a pone "conservatoir beslag" riba 3 cas na Corsou. Ta trata di 3 cas den 2 diferente caso. Tur dos caso ta riba peticion di husticia di Hulanda. E propiedad confisca ta 1 cas riba Caracasbaaiweg y 1 cas den Jan Thiel miho conoci como "Damasco Resort".  E dos casnan aki ta pertenece na e sospechoso C.D. di nacionalidad Surnam. E di tres cas cu beslag a ser pone riba dje ta situa na Blue Bay Resort y ta pertenece na e sospechoso Hulandes Europeo A. van W.

Tur e tres casnan aki a ser pone den beslag den cuadro di e cooperacion estrecho riba e tereno hudicial entre Hulanda y Islanan Hulandes-caribense. A pone beslag den cuadro di un investigacion di labamento di placa (witwassen/money laundering).