Analisis 2: Encuesta politico y e realidad politico

E encuesta politico cu NoticiaCla.com a presenta hunto cu Doc Opleiding recientemente, ta proba loke hopi ta(bata) specula: hopi no sa ainda pa ken nan lo vota den e proximo eleccion aki. Y tambe ta resalta cu ainda tin e ‘cultura di miedo’ unda cu un grupo no ta(bata) dispuesto pa bisa den e encuesta pa ken nan ta bay vota. Cultura di miedo, pasobra e encuesta aki no ta revela bo identidad den ningun forma. Y ni asina por lo menos 10% di esnan encuesta, no tabata dispuesto pa divulga pa ken nan lo bay vota. Nan derecho, pero e ta keda un asunto cu tin cu atende.

PARTIDO MAS POPULAR

Y djey tin e resultado popular cu tur hende kier sa: Cua ta e partidonan mas popular pa eleccion. E resultado por ta a sorprende hopi hende. Algun a indica cu esaki por bien ta e resultado di e proximo eleccion. Con cu partidonan interpreta esaki, mester corda cu e ta un encuesta cientifico, y cu tin varios factor cu tin cu tene cuenta cu ne prome cu bay coy e resultado y broma cu ne, of deshaci di dje, dependiendo cua partido bo ta. Entre e factornan, tin un grupo cu no sa pa ken vota, y un otro cu no kier bisa. Si descarta e gruponan aki, por tin mal interpretacion real di e encuesta. Loke tur tin cu traha ariba, ta e grupo cu ainda no sa pa ken nan tin cu vota. Y si mira e panorama actual, e actividadnan politico, e grupo aki por keda asina por lo pronto.