WEB: Aumento di tarifa lo para perdida financiero

ORANJESTAD – Aumento gastonan di combustibel, periodo di biento excesivo y menos uzo di coriente ta motibo principal pa aumento di tarifa otro luna. Despues di e dialogo social di diahuebs, WEB a sali bin cu nan comunicado pa presenta e motibonan pa cual tin un aumento di tarifa. Segun WEB durante e prome mitar di e aña aki, WEB a nota perdida financiero a consecuencia di diferente desaroyo. Ta trata aki entre otro di aumento drastico di e handling fee cual Valero a dicidi di cobra WEB for di aña pasa, un cambio den e manera cu Valero ta factura WEB y tambe uzo di mas hopi combustibel (Heavy Fuel Oil-HFO) cu a premira. Otro factor cu a trece un presion financiero ta e hecho cu benta di coriente a baha. E bahada di benta no ta algo cu WEB ta mira como un menasa den futuro; den su strategia coorporativo WEB a pone como un di su metanan pa explora proyectonan di benta nobo.

Pa locual ta trata e aumento drastico den e handling fee y e cambio den manera cu Valero ta factura WEB, gerencia a haci hopi esfuerso pa negocia cu Valero e prijs y e sistema di factura. Sinembargo esaki no a duna fruta.

Pa locual ta e uzo di mas hopi combustibel cu a premira, e vocero di WEB ta splica cu esaki ta debi na e manera con actualmente e unidadnan na WEB ta genera coriente, pero tambe na e periodonan di biento fuerte, cual a resulta mas cu a premira. Actualmente e unidadnan no por acapara eficientemente e fluctuacion nan extra den suministro di energia di biento, combina cu e fluctuacion den demanda di energia di comunidad di Aruba. Dor di esaki y pa keda mantene nivel halto di confiabilidad, e unidadnan di WEB no ta operando na nan punto di mayor eficiencia. Cu otro palabra, ta usando relativamente mas combustibel pa produci e mesun cantidad di energia.

Segun e vocero di e compania, WEB ta explorando diferente alternativa pa warda e energia extra y ta den proceso pa cuminsa cu implementacion di esakinan. Conhuntamente cu esaki ta den proceso pa implementa un sistema mas avansa (Intelligent Generation Management System) cu lo por absorba e impacto di fluctuacion nan extra den suministro di energia di biento combina cu e fluctuacion den demanda di energia di comunidad. Na mes momento e sistema nobo aki lo habri caminda pa introduccion di mas sistema sostenibel, confiabel y pagabel di generacion di coriente. Tur esaki pa reduci mas ainda e uzo di combustibel den futuro.  

Riba e benta di coriente, esta e consumo cu a baha, ta investigando si esaki tin di haber cu algun consumidor grandi (entre otro hotel), a cera nan porta y of a inverti den instalacionnan mas eficiente. Tambe no mester descarta e hecho cu clientenan a inverti den airco y frishider tipo inverter cual a baha nan consumo di coriente. Esaki ta di aplaudi y WEB ta sigui stimula clientenan pa haci esaki. E bahada di benta no ta algo cu WEB ta mira como un menasa den futuro; den su strategia coorporativo WEB a pone como un di su metanan pa explora proyectonan di benta nobo, manera por ehempel benta di awa y coriente directamente na barconan crucero. Un otro ehempel di un proyecto cu ya WEB a explora ta esun di e bus electrico. Resultado di e proyecto aki ta cu pa awor e ta resulta mucho caro ainda. Mirando cu tecnologia ta desaroya rapidamente, kisas den futuro cercano si e lo por bira algo factibel pa WEB y Aruba. Asina WEB lo sigui explora maneranan pa ofrece productonan sostenibel pero pagabel.

E factornan menciona, segun e vocero di WEB, a trece consecuencianan financiero pa WEB, cu ta mas cu WEB por carga na e momento aki, tambe si considera WEB su plannan pa futuro. For di aña pasa WEB a trata di cubri e perdida financiero aki sin aumenta e tarifa, sigur si considera e impacto cu esaki lo por tin riba economia. Sinembargo awor a yega na un punto cu no responsabel mas pa WEB carga e perdidanan aki, teniendo cuenta cu su likides lo bay den peliger y cual no ta aceptabel pa WEB su inversionistanan. Cu esaki gerencia di WEB Aruba ta spera di a aclarea e necesidad di aumenta e tarifa di coriente pa ELMAR entrante 1 di october 2014.