Update: Refineria Isla tabatin candela den un di su plantanan

WILLEMSTAD – Diadomingo 21 di mei pa 05:47 mainta, operadornan di e plant di Crude Distiller 3 (CD-3) a bati alarma di candela pa un pomp na un di e columnanan di destilacion. CD-3 ta un di e prome plantanan den e cadena di refinacion di Refineria Isla cu ta produci entre otro gasolin. Na luna di april e planta di CD-3 a caba di sali for di un mantencion planifica grandi. Investigacion preliminar a conclui cu probablemente e candela a cuminsa na un pomp na un di e columnanan den e planta. A instala un team di investigacion cu lo bay profundisa den causa di e incidente y tambe determina e extension di e daño cu e instalacion a sufri.

Loke Refineria Isla por raporta concretamente na e momento aki ta: 

1.       A bati alarma pa 05:47 mainta. E candela a keda completamente paga pa 09:20.

2.       No tabatin ningun persona lesiona.

3.       Refineria a notifica tur instancianan di Gobierno concerni.

4.       Refineria Isla tambe a reuni mesora cu Gobierno su team di calamidad y a informa nan riba e incidente.

5.       Loke a kima ta gasolin y otro zeta cu ta sobra na final di e proceso di destilacion. E emision no a encera daño pa habitantenan den becindario.

6.       Refineria Isla tin seguro cu ta cubri daño causa pa candela na su instalacionnan.

7.       Tin suficiente, gas, gasolin, kerosin y diesel pa abastece mercado local.