DeMeza: Na dialogo di energia a ‘informa’ y no ‘dialoga’

ORANJESTAD – Entrante 1 di october proximo, e prijs ‘average’ pa coriente ta subi cu 4.7 cent pa kilowatt, cu ta traduci na 10% di aumento. Esaki ta un hecho confirma pa gobierno na NoticiaCla.com y cu a keda presenta formalmente na e partnernan di e dialogo social di energia diahuebs atardi. Mas prome den dia, a duna un presentacion tambe na parlamento riba e mesun topico. Contrario na e pensamento cu e tarifa ta aumenta cu 15%, e mandatario a coregi e informacion indicando cu dependiendo di e consumo, e prijs por varia.

E mandatario a confirma tambe cu enberdad e dialogo di diahuebs, tabata mas bien uno di informacion enves di un dialogo unda cu por a intercambia di idea. E la compronde tambe cu un sindicato a bandona e sala (lesa otro articulo adhunto) pa e motibo ey. E mandatario tambe a confirma cu e la toca e tema diahuebs cu tanto ATIA como KvK y aki a resulta cu tabatin un 'misunderstanding' pa cual ambos a opta pa no bin e presentacion (lesa articulonan adhunto). E no tabatin problema cu esey, y a referi na e protocol di 2012, specificamente articulo 9, cu ta dicta cu ora cu tin cambio di tarifa, e compania tin cu bin dilanti prome y motiva su decision pa aumenta tarifa. “E no tabata uno pa tuma decision, pero mas bien pa duna informacion den un session di Q&A (hasi pregunta y ricibi contesta).

Bek pa e tarifa, esaki enberdad ta aumenta, y e ta varia di esnan cu ta usa te cu 500kilowatt y di 500 bay ariba. Average pues esaki ta traduci na un aumento di 4.7 cent pa kwh. Den comunidad, ta usando e cifra di entre 12 pa 15% cu por ta dependiendo di e consumo di e usuario. Pero atrobe, averahe esaki ta 10%. Factornan diferente a pone cu mester a aumenta e tarifa. Cobransa diferente di Valero tabata uno, (ta cobra den un forma cu ta perhudica WEB, compara cu antes), y menos uso di consumo, basa riba tecnologia pa spaar coriente tabata e otro. Tur esaki mientras cu e gastonan si ta keda mescos.

A mustra cu mientras cu WEB (contrario di informacionnan cu a sali anteriormente segun e mandatario) no ta den ‘rood’ awor, si no a tuma e medidanan aki, e lo por ta den ‘rood’ na 2015. Algo cu no por . E mandatario sinembargo no a elabora pakico den pasado e la bisa si cu WEB ta den rood, aunke cu e no tabata un ‘preocupacion’. Mes momento e mandatario a ripiti tambe cu mester mira esaki como algo ‘positivo’ si tene na cuenta cu pa 2 aña no a mishi cu e tarifa di coriente, en comparacion cu e añanan anterior.