Carteranan Paul Croes oficialmente traspasa pa Angel Bermudez

ORANJESTAD – Gobernador Alfonso Boekhoudt a traspasa carteranan di minister Paul Croes oficialmente pa Angel Bermudez. NoticiaCla.com tin e confirma cu esaki a sosode recientemente (12 di mei ultimo). Esaki ta nifica cu Croes ta keda sin cartera, sin responsabilidad, sin tarea, pero ta keda cu e posicion di minister y su salario. A compronde te hasta cu no mester a cambia e LIM (Landsverordening Instelling Ministeries). Minister Bermudez a confirma esaki tambe awe durante un conferencia di prensa riba un otro tema. Cu esaki, Paul Croes ta bira awor un minister sin cartera. Tur esaki mientras cu investigacion contra su caso ta continua. A compronde cu gabinete Mike Eman II a opta pa no suspende e minister, apesar di e desaroyo nobo den e caso. 

DESAROYO NOBO DEN E CASO ENVOLVIENDO PAUL CROES

Pa loke ta e caso, e siman aki a cay e prome detencion den e caso conoci como Ibis, unda cu a detene e tussenpersoon J.F. riba sospecho di actieve ambtelijke omkoping, den cual entre otro, minister Paul Croes ta wordo sospecha di corupcion (ambtelijke corruptie), maluso di funcion y traficacion di hende. J.F. ta traha como tramitador di permiso. Tramitadornan di permiso ta personanan cu tin como profesion of cu tin un compania cu ta intermedia pa stranheronan ora di pidi permisonan di estadia. Nan ta cobra pa esaki.