Resultado encuesta: 24% no sa ainda pa ken nan vota

ORANJESTAD – Un total di 24% di personanan encuesta, no sa ainda pa ken nan vota ainda den e proximo eleccion. Tambe gran mayoria no ta kere cu sticker y bandera di partido ta determina con e pais lo vota. Mescos, e mayoria encuesta no ta vota tradicional, manera nan famia a vota den pasado. Pa medio di un encuesta politico cu Doc Opleiding a haci recientemente pa NoticiaCla.com, e informacion aki y mucho mas a bira conoci. Durante varios dia, centenares di persona a participa na e encuesta online, y a duna asina nan input. Mientras cu e margen cu mester a yega pa e ta representativo ta algo mas cu 550 participante, esaki a surpasa net doble, yegando 1055 persona.

DATONAN INTERESANTE ACUMULA

For di e encuesta, (tin mas informacion y encuesta na caminda), e mayoria kier sa p.e. di unda e placa di campaña ta bin. Aworaki no tin un ley cu ta obliga partidonan divulga esaki. Y segun e encuesta, esaki ta importante. Un total di 92% a bisa cu nan kier wak esaki cambia. Tambe mayoria ta mustra cu nan no ta sigui solamente un partido sino mas cu uno, mientras cu menos cu mitar ta sigura cu nan si ta fiel y ta sigui solamente kico un solo partido ta haci y move (p.e. riba rednan social). E gran mayoria, 95% no ta kere den campaña di sticker y bandera. Algo interesante ta e hecho cu tin casi un empate ora ta papia pakico ta vota, esta si ta vota pa partido of ta mas importante vota pa e persona specifico. Pues, nan ta bay tras di e persona y no necesariamente pa e partido.

STATUS Y POSICION DI PARTIDO

Pa hopi, e parti mas interesante ta pa sa ‘pa ken’ un persona ta vota. Gran mayoria no tabatin problema pa bisa pa ken (e encuesta ta anonimo), y a pone pa ken nan ta vota. Un grupo chikito toch no tabata dispuesto pa bisa pa ken nan ta vota. Loke a hala mas atencion sinembargo, ta e grupo cu no sa ainda pa ken nan vota. E total aki ta basta grandi, esta 24% cu ta bon pa por lo menos 5 asiento, basa riba e ultimo cifra di eleccion. Esey ta un grupo relativamente grandi cu no sa ainda den ki direccion nan mester bay. Pa loke ta partidonan na cabez, segun e encuesta, partido MEP ta na cabez cu 29%, AVP 17%, POR 10%, RED 2.6%, MAS 1.5%, CURPA 1.0%, UPP 0.6%, PPA 0.2% y partido ABO cu 0%. Esey ta nifica cu entre esnan encuesta partidonan MEP, AVP y POR ta lidera e tabla di partidonan te cu awor. Keda pendiente pa mas informacion.

 WAK E RESULTADO AKI