Ministerio publico ta confirma cargo extra contra minister Croes

ORANJESTAD – E cargonan di cual ta sospecha actual minister Paul Croes di dje, a aumenta cu uno mas, esta ‘traficacion di hende’. Asina vocero di ministerio publico Ann Angela a confirma pa NoticiaCla.com. For di ayera ta papiando riba e tema aki ora cu e relato nobo a sali, pero awe esaki a keda confirma pa ministerio publico. “E cargo di mensensmokkel a wordo agrega relaciona cu e hayazgo di e persona indocumenta na su cas” Angela a splica e portal aki. Ademas contrario na e prome relato, OM ta sigura cu lo tin mas detencion (fuera di esun di diamars), contrario na e prome relato cu ta bisa ‘no ta descarta’.

LABAMENTO DI PLACA

Tambe Angela ta splica cu e sospecho di labamento di placa (menciona den prome relato di prensa y no den esaki) ta keda. “Solamente cu no a mencion’e den esaki.

PROME DETENCION

Manera ministerio publico a anuncia caba, diamars a detene e ‘tussenpersoon’ J.F. riba sospecho di actieve ambtelijke omkoping den e investigacion penal “Ibis”, den cual entre otro, minister Paul Croes ta wordo sospecha di corupcion (ambtelijke corruptie), mal uzo di funcion y traficacion di hende. J.F. ta traha como tramitador di permiso. Tramitadornan di permiso ta personanan cu tin como profesion of cu tin un compania cu ta intermedia pa stranheronan ora di pidi permisonan di estadia. Nan ta cobra pa esaki. Wak e prome relato (27maart) AKI, y e ultimo relato AKI (15 mei) di ministerio publico riba e tema. Foto ta esun mas recien di Paul Croes durante su momento cu colega minister Mike de Meza y parlamentario Jeffrey Kelly di AVP.