Croes: Lo anda corectamente cu matanan corta y re-uza varios parti

ORANJESTAD – Mientras cu director di DOW Marlon Croes ta admiti cu e kapmento diasabra y awe di e matanan di kwihi ta haci dolor, e ta mustra tambe cu e final ta cu lo tin un miho fluho di trafico pa tur automobilista. Manera NoticiaCla a informa caba den fin di siman, tabatin basta critica riba e hecho con a procede ora cu diripiente a mira trabou di kapmento di e palonan a cuminsa. Croes tabata conciente di esey y a duna splicacion amplio riba e motivacion y tambe e proceso.

KICO TA PASA CU VEGETACION GEKAP?

Segun Croes, a haci un estudio ambiental pa mira cua medida mester tuma pa por tin un balance di naturalesa y rescate di loke a kita. A traha cu entre otro DLVV (Directie Landbouw Veeteelt en Visserij) y DNM (Directie Natuur & Milieu), pa wak con miho cuida nos medio ambiente door di tambe planta matanan bek otro caminda y asina restaura gran parti di e loke a kita. A splica cu riba e ruta entre LG Smith y RIU Antillas y riba rotondenan lo tin hopi plantacion di mata. Matanan cu a wordo kita y gekap, lo wordo uza bek den otro forma. A bisa cu a percura pa hiba nan Barcadera unda cu lo traha compost di nan, y e tronconan lo uza nan pa artesanonan local. Tambe a compronde cu gran parti lo wordo uza pa groundcover (tapa di caminda) , pues lo uza hopi cos bek.